Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 394 Hüküm no: 522 Orijinal metin no: [78a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zeyni Hatun’un takas beyanı Mahmiye-i Galata mahallâtından Bereketzâde mahallesi sâkinelerinden Zeyni Hâtun bt. Mustafa mahfil-i kazâda işbu bâ‘isü’l-hurûf Mehmed Çelebi b. Hasan mahzarında ikrâr ve takrîr-i kelâm edip Mani nâm zimmîde bahçe bahâsından kırk bin akçe hakkımı bundan akdem kabz ve îsâle Ahmed nâm kimesne[yi] vekîl nasb eylemiş idim hâlen mezbûr Ahmed’i vekâlet-i merkūmeden azl edip mezbûr Mehmed’i vekîl eyledim zikr olunan kırk bin akçeyi benim için kabz eyleyip kendiye olan karz-ı şer‘îden yetmiş bin akçe deynimin kırk bini için takās eyleye dedikde mukırr-ı mezbûrenin vech-i meşrûh üzre olan ikrârını mukarrun lehü’l-mersûm Mehmed Çelebi bi’l-muvâcehe tasdîk ve vekâlet-i merkūmeyi kabûl eyledikden sonra mâ hüve’l-vâki‘ ketb ve tahrîr olunup yedine vaz‘ ve def‘ olundu. Tahrîren fi’l-yevmi’t-tâsi‘ ve’l-ışrîn min şehri Saferi’l-muzaffer sene seb‘a ve elf. Şuhûd: Mehmed b. Abdullah el-İmâm, Ahmed b. el-Hâc Ali el-Müezzin, Cafer Bey b. Abdullah, Mehmed Çelebi b. Ferhad, Musa b. İshak ve gayruhüm