Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 394 Hüküm no: 524 Orijinal metin no: [78a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Evin Sâbite Hatun’a ait olduğu Tophâne mahallâtından Ebülfazl mahallesi sâkinelerinden işbu hâfızatü’l-kitâb Sâbite Hâtun bt. Ali kıbelinden husûs-ı âti’l-beyâna vekîl-i şer‘î olup vekâleti nehc-i şer‘î üzre sâbite olan Mustafa b. Ahmed mahfil-i kazâda müteveffâ-yı âti’z-zikrin sulbî kebîr oğlu Ömer ve sagīr oğlu Hüseyin’in ta‘dîl-i umûru için vasî olan Şaban b. Abdullah mahzarlarında bi’l-vekâle ta‘bîr merâm edip müvekkile-i merkūmenin kayınatası olup vefât eden Hüsrev Bey b. Abdullah yine mahalle-i merkūmede vâki‘ fevkānî ve tahtânî büyût-ı müte‘addideyi ve selâmlığı ve iki sofayı ve bir pınarı ve kenîfi ve muhavvatayı hâvî olup iki tarafdan yine Ebülfazl vakfı ile bir tarafdan tarîk-i hâs ile bir tarafdan Abdi Çelebi nâm kimesne mülkü ile mahdûd olan mülk-i hâlis menzilini bi cemî‘i’l-hudûd ve’l-hukūk târih-i kitâbdan üç ay mukaddem merkūme Sâbite’ye elli bin akçe bâtten bey‘ edip yirmi bin akçesini kabz ve tesellüm eyleyip menzil-i merkūmu tahliyye ve teslîm edip ol dahi kabz eyledikden sonra menzil-i mezkûrda mezbûr Hüsrev Bey kayınatası olduğu mülâbese[siyle] iskân eyleyip bu vechile menzil-i merkūmu mutasarrıfe olup müşârün-ileyh Hüsrev Bey dahi vefâtından mukaddem huzûr-ı müslimînde böylece ikrâr edip vech-i meşrûh üzre akd-i bey‘i ve kable’l-vefât ikrârını bilir müslümanlar dahi var iken hâlen menzil-i merkūmu müvekkilemin tasarrufuna mezbûrân Ömer ve Şaban mâni‘ olurlar vâki‘ hâl suâl olunup def‘ ve men‘ olunmalarını taleb ederin dedikde mezbûrân Ömer ve Şaban istintâk olunacak menzil-i merkūm mezbûr Hüsrev Bey’in mülkü idi vefât edip veresesine intikāl eylemişdir mülk-i mevrûsumuzdur müvekkile-i mezbûreye bey‘ini ve kable’l-vefât dahi ikrârını münkir olmağın vekîl-i mezbûrdan [78b] takrîrine muvâfık beyyine taleb olundukda İsa b. İbrahim ve Yunus Bey b. Abdullah nâm kimesneler li ecli edâi’ş-şehâde mahfil-i kazâya hâzırlar olup istişhâd olunduklarında fi’l-vâki‘ müteveffâ-yı mezbûr Hüsrev b. Abdullah hâl-i sıhhatinde târih-i kitâbdan üç ay mukaddem menzil-i mahdûd-ı merkūmu müvekkile-i mezbûre Sâbite bt. Ali’ye elli bin akçeye bey‘-i bât ile bey‘ edip yirmi bin akçesini kabz edip teslîm-i mebî‘ eyledi biz bu husûsa şâhidleriz şehâdet dahi ederiz deyip ve Murad Halîfe b. Abdullah el-İmâm ve Ömer Çelebi b. Mehmed ve Ali b. ( ) nâm kimesneler dahi müteveffâ-yı mezbûr Hüsrev menzil-i mahdûd-ı merkūmu mezbûre Sâbite bt. Ali’ye târih-i kitâbdan üç ay mukaddem elli bin akçeye bâtten bey‘ edip yirmi bin akçesini kabz eyleyip teslîm-i mebî‘ eyledim menzil-i merkūmda benim medhalim yoktur kable’l-vefât ikrâr eyledi bu husûsa şâhidleriz şehâdet ederiz deyip bi’l-muvâcehe edâ-i şehâdet eylediklerinde ba‘de’t-ta‘dîl ve’t-tezkiyye makbûle olup mûcebiyle menzil-i merkūm mezbûre Sâbite’nin mülk-i müşterâsı olmak üzre hükm olunup mâ vaka‘a kayd olundu. Tahrîren fî evâhiri şehri Saferi’l-muzaffer sene seb‘a ve elf. Şuhûd: Abdi Reis b. Ahmed Kapudân, Numan b. Emrullah, Ali b. Abdürrahim, Hüseyin [b.] Hasan, Mehmed b. Ali, Bayezid Reis [b.] Mehmed, Sefer b. İsmail, Mustafa [b.] Hasan