Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 412 Hüküm no: 553 Orijinal metin no: [82b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çavuş’un ölen Âişe’nin vasiyetlerinin tenfizine vasî seçildiği Mahrûse-i Galata mahallâtından Yolcuoğlu mahallesinde bundan akdem fevt olan Âişe bt. Mehmed nâm müteveffâtın vâlidesi Hatice bt. Süleyman ve merkūme Âişe’nin sulbiye kızı Ümmühâni bt. İskender nâm hâtunun zevci ve husûs-ı âti’z-zikre vekîl olup bimâ hüve tarîkü’s-sübût şer‘an vekâleti sâbite olan Selim Reis b. Beyce nâm kimesne merkūme Âişe’nin ammisi Ahmed Çavuş b. Hüseyin nâm kimesneyi mahfil-i kazâya ihzâr ve mahzarında takrîr-i da‘vâ edip merkūm Ahmed Çavuş müteveffât-ı mezbûre Âişe’nin muhallefâtının sülüsünü vasiyyet edip tenfîz-i vesâyâ için beni vasiyy-i muhtâr eyledi deyû yirmi dört bin akçe kabz eylemişdir fi’l-vâki‘ sülüs malını müteveffât-ı merkūme Âişe vücûh-i hayrâta vasiyyet eylemişdir lâkin merkūm Ahmed Çavuş’u vasiyy-i muhtâr eylediği ma‘lûmumuz değildir vâki‘ hâl merkūm Ahmed Çavuş’dan suâl olunsun dediklerinde gıbbe’s-suâl merkūm Ahmed Çavuş cevâb verip fi’l-vâki‘ müteveffât-ı merkūme Âişe sülüs-i mâlını vücûh-i hayrâta vasiyyet edip beni vasiyy-i muhtâr edip vasî olduğum cihetle yirmi dört bin akçe alıp kabz eyledim deyicek merkūm Ahmed Çavuş’dan makālini musaddık beyyine taleb olundukda udûl-i müslimînden el-Hâc Hasan b. Abdullah ve Abdülkādir b. Hoca ( ) nâm kimesneler li ecli’ş-şehâde mahfil-i kazâya hâzırân olup fi’l-vâki‘ müteveffât-ı merkūme Âişe sülüs-i mâlını vasiyyet edip mezbûr Ahmed Çavuş’u tenfîz-i vesâyâ için vasiyy-i muhtâr eyledi biz bu husûsa şâhidleriz şehâdet dahi ederiz dediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ olup mâ hüve’l-vâki‘ bi’t-taleb tahrîr ve ketb olunup yed-i tâlibe vaz‘ ve def‘ olundu. Tahrîren fî evâili şehri Rebî‘ilâhir sene seb‘a ve elf. Şuhûd: Abdi Reis b. Ahmed, Hüsrev b. Abdullah, Mehmed b. Yusuf, İbrahim b. Mustafa, el-Hâc Hasan b. Abdullah ve gayruhüm