Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 427 Hüküm no: 572 Orijinal metin no: [85b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi’nin kaynanası Kamer Hatun’u vasî seçtiği Sâbıkan cebeciler kâtibi olup bundan akdem fevt olan merhûm Ahmed Çelebi nâm müteveffânın oğlu Mustafa sagīrine vasiyy-i muhtârı olup Tophâne mahallâtından merhûm Cihangir mahallesi sâkinelerinden Kamer bt. Cihan nâm hâtun tarafından husûs-ı âti’z-zikri da‘vâ ve kabz ve îsâle vekîl olup Süleyman Bey [b.] Abdullah ve Sinan b. Ahmed şehâdetleriyle şer‘an vekâleti sâbite olan fahrü’l-kuzâ[t] mevlânâ Şaban Efendi b. Bahşi nâm kimesne Yusuf Bey b. Abdi nâm kimesneyi meclis-i kazâya ihzâr ve mahzarında takrîr-i da‘vâ edip mezbûr Yusuf Bey zimmetinde müteveffâ Ahmed’in karz-ı şer‘îden iki bin akçesi olup sagīr-i mezbûr Mustafa’ya intikāl eylemişdir vekâletim hasebiyle taleb ederim suâl olunsun dedikde gıbbe’s-suâl mezbûr Yusuf Bey bi’l-külliyye inkâr ile cevâb verip mezbûr Ahmed’e bir akçe deynim yoktur ve mezbûre Kamer Hâtun’u vasiyy-i muhtâr eylediği dahi ma‘lûmumuz değildir deyicek udû[l]-i müslimînden Mustafa b. Abdullah ve Hüseyin b. Abdullah nâm kimesneler li ecli’ş-şehâde mahfil-i kazâya hâzırân olup müteveffâ-yı mezbûr Ahmed’i ihdâ ve elf Saferi’nin evâilinde Eflak seferine gittiği hînde kayınanası mezbûre Kamer Hâtun’u vasiyy-i muhtâr eyledi biz bu husûsa şâhidleriz şehâdet dahi ederiz dediklerinde ba‘de’t-ta‘dîl ve tezkiyye şehâdetleri hayyiz-i kabûlde vâki‘ olup mâ hüve’l-vâki‘ alâ vukū‘ihî ketb olundu. Tahrîren fî evâili şehri Cumâdelûlâ sene seb‘a ve elf. Şuhûd: Mahmud b. Kılıç, Mehmed b. İlyas, Hamza b. Abdullah, Hüsrev b. Abdullah, Hüseyin b. Ali, ve gayruhüm