Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 91 Hüküm no: 79 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mirasçıların evi Sâliha bt. Ahmed’e sattıkları Mahmiye-i Galata tevâbi‘inden Cihangir mahallesinde [sâ]kine olup Mısır yolunda deryâda bundan akdem vefât eden el-Hâc Hüseyin b. Abdullah’ın li ebeveyn karındaşı oğulları ve usûbet-i nesebiyye tarîkiyle vârisleri olan Mahmud ve Mehmed taraflarından bey‘-i âti’l-beyânı ikrâra vekîl-i şer‘î olup fahrü’l-emâsil ve’l-akrân Hasan Bey b. Süleyman nâm sarrâc-ı hâssa ve Nurullah Çavuş b. Muharrem nâm kimesne mahzarında vekâleti sâbit olan Yusuf Bey b. Abdullah nâm bevvâb-ı sultânî mahfil-i kazâda Sâliha bt. Ahmed nâm hâtun mahzarında bi’t-tav‘ ve’r-rızâ ikrâr ve i‘tirâf edip verâseti zevcesi Mehlika bt. Abdullah nâm hâtun ve li ebeveyn karındaşı oğulları müvekkilân-ı mezbûrâna münhasıra olan merhûm-ı mezbûrdan irs-i şer‘le müvekkilân-ı merkūmâna intikāl edip mahalle-i mezbûrede vâki‘ bir beyt-i süflîyi ve altında bir hücre ile ve bir su kuyusunu ve eşcâr-ı müsmire ve gayr-ı müsmireyi hâvî hadîkayı müştemil olup hudûdu kıbleten Sefer Reis mülküne ve şarkan ba‘zan Gazanfer Ağa mülküne ve ba‘z-ı âharı merhûm-ı mezbûrdan mezbûre Mehlika’ya intikāl edip hisse-i şer‘iyyesi olan menzile ve şimâlen tarîk-i âmma ve garben Sefer Reis vakfı’na müntehî olan menzili cemî‘-i tevâbi‘ ve levâhıkı ile müvekkileyn-i mezbûrân Mahmud ve Mehmed Bey merkūme Sâliha’ya on sekiz bin fıddî-yi Osmânî râyic akçeye bey‘-i bâtt-ı sahîh-i şer‘î ile bey‘ edip meblağ-ı mezbûru bi’t-tamâm mezbûre Sâliha yedinden ahz u kabz edip teslîm-i mebî‘-i mesfûr eyledim ba‘de’l-yevm menzil-i mezbûr cemî‘ tevâbi‘ ve levâhıkı ile mezbûre Sâliha’nın mülk-i müşterâsıdır keyfe mâ yeşâ’ ve yahtâr tasarruf eylesin dedikde vekîl-i mezbûrun bi’l-vekâle vech-i meşrûh üzre sudûr eden ikrârını merkūme Sâliha vicâhen tasdîk ve şifâhen tahkīk [19a] eyledikde mâ vaka‘a bi’t-taleb ketb olundu. Cerâ zâlike ve hurrire fî evâsıtı Zilka‘de sene hamse aşere ve elf. Şuhûdü’l-hâl: Ali Halîfe b. Yusuf el-İmâm, Ahmed b. Mustafa el-Müezzin, Mustafa b. Abdi, Behrâm Bey b. Abdullah, Yusuf Bey Abdullah el-bevvâbü’s-sultânî, Mustafa b. Süleyman, Keyvan Çavuş b. Abdullah, Mehmed b. ( ) el-Müezzin, Veli [b.] Bâli el-Kayyım, Cafer b. Abdullah el-Kayyım, İlyas Bey b. Nasuh, Ahmed Bey b. Durmuş, Mehmed Bey b. Abdullah, el-bevvâbü’s-sultânî ve gayruhüm