Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 126 Hüküm no: 132 Orijinal metin no: [32b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Efendi b. Mustafa’nın mîrâsçılarının kendilerine intikal eden evdeki mîrâs paylarını Veli Kapudân’a satmaları Mahmiye-i Galata dâhilinde Sultan Bayezid Han aleyhi’r-rahmetü ve’l-gufrân mahallesi sâkinlerinden olup cezîre-i Kıbrıs’da defterdâr iken bundan akdem vefât eden merhûm İbrahim Efendi b. Mustafa’nın sulbiye sagīre kızı Sâliha’nın cânib-i şer‘-i kavîmden mansûb vasîsi olup ve vâlidesi olan Aynî Hâtun bt. Abdullah ve merhûm-ı mezbûrun sulbiye kebîre kızı Râbia ve sulbî kebîr oğlu İsmail Bey ve merhûm-ı mezbûrun zevce-i metrûkesi ve vârisesi Fâtıma bt. Veli Kapudân meclis-i şer‘-i şerîfde müşârün-ileyh Veli Kapudân mahzarında bi’t-tav‘i’s-sâf ikrâr ve i‘tirâf edip merhûm-ı mezbûrun muhallefâtından mahalle-i merkūmede vâki‘ olup bir beyt-i süflîyi ve beyt-i ulvîyi ve bir kenîfi müştemil olup bir tarafı mezbûr İsmail Bey mülküne ve bir tarafı merkūme Râbia mülküne ve bir tarafı Haydar hadîkasına ve taraf-ı ahırı tarîk-i âmma müntehî olup fevt oldukda irs-i şer‘le bi tarîki’l-inhisâr verese-i mesfûreye intikāl edip beynlerinde otuz iki sehim olan menzil bey‘ olunmak için sûk-ı sultânîde mirâren ve kirâren mezâd ve müzâyede olup sekiz bin akçede müşârün-ileyh Veli Kapudân’ın üzerinde karâr edip bir akçe ziyâde ile tâlib ve râgıb olmamağın otuz iki sehim olan menzil-i mezbûrdan sagīre-i mezbûreye intikāl eden yedi sehim hisse-i şer‘iyyesini merkūme nafakası için ve merkūme Râbia’ya intikāl eden yedi sehim hisse-i şer‘iyyesini ve merkūm İsmail Bey’e intikāl eden dört sehim hisse-i şer‘iyyesini ve zevce-i merkūmeye intikāl eden dört sehim hisse-i şer‘iyyesini vesâyeten ve asâleten müşârün-ileyh Veli Kapudân’a meblağ-ı mezbûr sekiz bin fıddî Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledik ba‘de’l-yevm menzil-i merkūm cemî‘ tevâbi‘iyle müşârün-ileyh Veli Kapudân’ın mülk-i mahzıdır keyfe mâ yeşâ’ tasarruf eylesin dedikde mesfûre Aynî Hâtun’un vesâyeten ve merkūm İsmail Bey’in ve merkūmetân Râbia ve Fâtıma’nın asâleten vech-i meşrûh üzre sudûr eden ikrârlarını müşârün-ileyh Veli Kapudân vicâhen ve şifâhen tasdîk ve tahkīk eyledikde mâ vaka‘a gıbbe’t-taleb ketb olundu. Tahrîren fî evâili Muharremi’l-harâm sene sitte aşere ve elf. Şuhûdü’l-hâl: Hasan Bey b. Abdullah el-bevvâbü’s-sultânî, Ali Bey b. Yusuf er-Reis es-sultânî, Mustafa Çelebi b. Ali, Ahmed Halîfe b. Muharrem el-İmâm, Mehmed b. Yusuf el-Muhzır, Mustafa b. Mehmed el-Muhzır