Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 149 Hüküm no: 170 Orijinal metin no: [41b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nefise Hâtun bt. Hamza Bey’in, kızına vasiyy-i muhtâr nasbı Udûlden Yahya Efendi b. Mustafa Efendi ve İsmail Efendi b. Hacı Hasan nâm kimesneler, mahmiye-i Galata hâricinde vâki‘ Kasımpaşa kasabası mahallâtından Hacı Ferhad mahallesinde vefât eden merhûme Mahveş bt. Abdullah’ın zevci ve vârisi olan ve husûs-ı âti’l-beyânı inkâr eden Mahmud b. Şükrullah nâm hasm-ı câhid mahzarında, fahrü’l-muhadderât Nefise Hâtun bt. Hamza Bey kıbelinden vesâyet isbâtına vekâleti nehc-i şer‘î üzre sâbit olan hâmil-i hâze’l-kitâb vekîl Himmet b. Mehmed’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, merhûme-i mezbûre hâl-i hayât ve kemâl-i akl ve sıhhatinde müvekkile-i mesfûre Nefise Hâtun’u sadriyye sagīre Fâtıma nâm kızının umûrunu görmek ve ona merhûme-i mezbûreden intikāl edecek malları zabt etmek için vasî seçmişdi. O da vesâyet-i mesfûreyi kabûl edip hizmet-i lâzımesini edâyı ta‘ahhüd etmişdi. Merhûme Mahveş bu ihtiyârı üzre vefât etti ve sağlığında bu ikrârından dönmedi. Şehâdetleri ba‘de şerâiti’l-kabûl inde’ş-şer‘ mu‘teber ve makbûl olmağın mûcebince hükm edildi. Cerâ zâlike ve hurrire fî evâili Rebî‘ilevvel sene sitte aşere ve elf. Şuhûdü’l-hâl: İsa Çelebi b. Abdülaziz, es-Seyyid Ali b. Seyyid Bayezid, es-Seyyid İsmail b. Veli