Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 151 Hüküm no: 172 Orijinal metin no: [42a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Mustafa’nın bir miktar para ve bazı eşyasını annesine hibe ettiği Kasaba-i Hazreti Ebî Eyyûb-i Ensârî -aleyhi rahmetü’l-Bârî- mahallâtından Molla Atûfî mahallesi sâkinlerinden zümre-i zincirciyândan Mehmed Çelebi b. Mustafa nâm kimesne mahfil-i kazâda işbu sâhibetü’l-kitâb vâlidesi Âişe Hâtun bt. Hasan Ağa tarafından hibe-i âti’z-zikri tasdîk ve kabûle Ahmed Ağa b. Abdullah ez-Zevvâk ve Mehmed Bey b. Sinan el-Cündî şehâdetleri ile vekâleti sâbite olan Mustafa Subaşı mahzarında takrîr-i kelâm edip babam Mustafa Ağa ve karındaşım Sâlih’den bana intikāl eden altı bin iki yüz altını vasiyy-i muhtârım olan Mehmed Ağa’dan alıp kabz eyledikden sonra üç bin beş yüz altını ba‘zı mesârifime harc ve sarf eyledim bâkī kalan iki bin yedi yüz altını ve bir gümüşlü eyer ve bir müsta‘mel serâser abayı ve bir gümüşlü raht ve bir gümüşlü kılıcı ve bir gümüşlü şamdan ve bir sorguç bu cümle zikr olan esbâbı ve meblağ-ı mezbûru vâlidem merkūme Âişe Hâtuna üzerimde olan hukūk-ı vâcibesi mukābelesinde hibe ve teslîm eyledim ol dahi zikr olunan esbâbı meclis-i hibede kabûl ve kabz ve ittihâb eyledikde ba‘de’l-yevm zikr olunan esbâb ve meblağı keyfe mâ teşâ’ mutasarrıfe olsun dedikde mezbûr Mehmed Çelebi’nin ikrâr-ı meşrûhunu vekîl-i mezbûr Mustafa Subaşı bi’l-muvâcehe tasdîk ve kabûl eyleyip sıhhat-ı hibe ve temlîke hükm olunup mâ vaka‘a gıbbe’t-taleb ketb olundu. Tahrîren fî evâili Rebî‘ilevvel sene sitte aşere ve elf. Şuhûdü’l-hâl: Ömer Subaşı b. Hasan, Hacı Kurd ...?, Ahmed Ağa b. Abdullah, Mustafa Subaşı, Ömer Çelebi el-Kâtib, Mustafa Çavuş b. Abdullah, Mehmed Bey el-Cündî, Mustafa Çelebi Yayabaşı, Mustafa Subaşı, Abdurrahman Efendi b. Veli, Mehmed b. Mustafa ve gayruhüm mine’l-hâzırîn