Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 184 Hüküm no: 230 Orijinal metin no: [56b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Rıdvan b. Abdullah’ın gemideki hissesinin sâbit olduğu Budur ki, hâric-i mahmiye-i Galata’da Hoca Ali mahallesi sâkinlerinden el-Hâc Rıdvan b. Abdullah mahfil-i kazâda Mekke-i mükerreme’de müteveffâ Ahmed Reis b. Yakub’un eytâmına vasiyy-i muhtâr olan li ebeveyn birâderi el-Hâc İbrahim b. Yakub muvâcehesinde takrîr-i da‘vâ kılıp bundan akdem müteveffâ-yı mezbûr Ahmed Reis zimmetinde karz-ı hasenden altı yüz elli filori ki nısfı üç yüz yirmi beş filori olur hakkım olup hacc-ı şerîfe gitmezden mukaddem hâl-i hayâtında ve kemâl-i sıhhatinde yeni gemi demekle ma‘rûf otuz sekiz zirâ‘ mülk sefînesi sekiz sehim olup sihâm-ı merkūmeden bir sehmini altı yüz elli filoriye bana bey‘ ve semenin zimmetinde olan meblağ-ı merkūm ile takās edip ben dahi kabûl ve kabz edip bu ana gelince minvâl-i meşrûh üzre mutasarrıf iken mezbûr Ahmed Reis vefât etmekle vasiyy-i mezbûr sefîne-i merkūmeye vaz‘-ı yed eder suâl olunup [57a] men‘ olunmasın taleb ederim dedikde gıbbe’s-suâl ba‘de’l-inkâr gıbbe’l-istişhâd fahrü’l-a‘yân el-Hâc Hüseyin Çelebi b. Ali ve Mustafa Reis b. İsa nâm kimesneler li ecli’ş-şehâde hâzırân olup müdde‘î-yi merkūmun da‘vâ-yı muharreresine muvâfık şehâdet-i şer‘iyye eylediklerinde şehâdetleri hayyiz-i kabûlde vâki‘ oldukdan sonra müdde‘î-yi mezbûr hisse-i mezkûreyi bi vechin mine’l-vücûh ve sebebin mine’l-esbâb mülkünden ihrâc etmediğine yemîn-i billâh eyledikden sonra hisse-i merkūme müdde‘î-yi merkūmun mülkü idiğine hükm olunup mâ vaka‘a ber sebîl-i temessük ketb olunup yed-i tâlibe vaz‘ olundu. Tahrîren fî evâhiri Cumâdelâhire sene sitte aşere ve elf. Şuhûdü’l-hâl: Fahrü’l-emâsil Mehmed Çelebi b. Hüseyin, fahrü’l-kuzât Osman Efendi b. İmrân, Mustafa b. Hüseyin, Mustafa b. Yusuf, Mahmud b. İsa, Mehmed b. Hasan, Ali b. Mehmed ve gayruhüm Yevmü’l-erbi‘â 10 Yevmü’l-hamîs el-mübârek inşâallahü ta‘âlâ 11