Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 204 Hüküm no: 259 Orijinal metin no: [63b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye Hâtun’un mehr-i müeccel alacağı olduğu Mahmiye-i Galata mahallâtından Câmi‘-i kebîr mahallesi sâkinlerinden olup bundan akdem vefât eden merhûme Rukiye Hâtun nâm müteveffânın vâlidi işbu râfi‘ü’r-rakam fahrü’l-eimme Şeyh Mehmed Efendi b. Ahmed mahzarında ve şer‘-i hatîr-ı lâzimü’t-tevkīrde müteveffât-ı mezbûrenin zevc-i metrûkü Mustafa Çelebi b. Mehmed mahzarında takrîr-i kelâm edip müteveffât-ı mezbûrenin zevci merkūm Mustafa Çelebi zimmetinde otuz bin akçe mehr-i müecceli olup meblağ-ı merkūmdan südüs hisse-i şer‘iyyemi vermekde müteveffât-ı mezbûre bana hibe etti diye te‘addî ve nizâ eder suâl olunup ihkāk-ı hak olunmak matlûbumdur dedikde gıbbe’s-suâl mezbûr Mustafa Çelebi fi’l-hakīka zevcem müteveffât-ı mezbûreye zimmetimde otuz bin akçe mehr-i müeccel olup maraz-ı mevtinde bana hibe etmişdi maraz-ı mevtde hibe câiz olmamağın mehr-i müeccel olan meblağ-ı merkūm otuz bin akçeyi mûmâ-ileyh eş-Şeyh Mehmed Efendi’nin südüs hisse-i şer‘iyyesi zimmetimde deyndir min ba‘d meblağ-ı merkūm bana hibe olunmuşdur diye da‘vâ ve nizâ‘ım yoktur diye ikrâr etmeğin mâ vaka‘a ketb olundu. Cerâ fi’t-târihi’l-mezbûr. Şuhûdü’l-hâl: eş-Şeyh İsa b. Ahmed, eş-Şeyh Osman b. Abdurrahman, el-Hâc Abdurrahman b. Mehmed, el-Hâc Ebûbekir b. Ahmed