Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 39 Hüküm no: 8 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Ali Reis’in menzil hissesini Mustafa Bey b. Abdullah’a satması Hâric-i Galata’da kasaba-i Kasımpaşa’da Emir Ali Çelebi mahallesi sâkinlerinden olup, verâseti sulbiye kızı Havva’ya ve zevcesi Emine bt. Abdullah’a inhisâr üzre bundan akdem vefât eden Ali Reis b. Sâdık nâm kimesnenin kızı mezbûre Havva meclis-i şer‘de, Dergâh-ı âlî bevvâblarından işbu hâfız hâze’l-kitâb Mustafa Bey b. Abdullah mahzarında ikrâr-ı tav‘î ve i‘tirâf-ı mer‘î kılıp, müteveffâ-yı mezbûrun terekesinden olup mahalle-i mezbûrede vâki‘ iki fevkānî beyti ve iki sofayı ve bir kileri ve iki tahtânî beyti ve bir fırın ve bir su kuyusunu ve kenîfi müştemil olup, bir tarafı Medîne-i Münevvere vakfı’na ve bir tarafı Râziye bt. Abdullah mülküne ve bir tarafı kapıcı Mehmed Bey mülküne ve bir tarafı tarîk-i âma müntehî olan menzilin sekiz sehimde yedi sehmi bana ve bir sehmi mezbûre Emine’ye intikāl etmeğin, zikr olan yedi sehim hisse-i şer‘iyye-i şâyi‘a-i mevrûsemi merkūm Mustafa Bey’e on altı bin altı yüz yirmi beş akçeye bey‘-i bât ile bey‘ edip, teslîm-i mebî‘ ve kabz-ı semen eyledim deyüp ve mezbûre Emine dahi meclis-i şer‘de kezâlik ikrâr ve i‘tirâf edip menzil-i mahdûd-ı mezbûrun sekiz sehimde bir sehim hisse-i şer‘iyye-i şâyi‘amı, merkūm Mustafa Bey’e iki bin üç yüz yetmiş beş akçeye bey‘-i kat‘î ile bey‘ edip teslîm-i mebî‘ ve kabz-ı semen ve merkūme Havva’nın menzil-i mezbûrdan bey‘ eylediği yedi sehmin derkine emr ve kabûlü hâvî kefâletle kefîl olduğuna mu‘terife oldukda, mukırretân-ı merkūmetân Havva ve Emine’nin vech-i meşrûh üzre cârî olan ikrârlarını el-mukarru’l-merkūm Mustafa Bey bi’l-muvâcehe tasdîk edicek, mâ-vaka‘a bi’t-taleb ketb ve sebt olundu. Tahrîren fî evâsıtı Zilhicceti’ş-şerîfe li sene isneyn ve ışrîn ve elf. Şuhûdü’l-hâl: Yahya Efendi el-Kadı, Abdüsselâm b. ( ) el-İmâm, Hüseyin b. Habil, Veli b. Bünyad, Mustafa Beşe b. Abdullah, Veli b. Ali ve gayruhüm.