Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 47 Hüküm no: 18 Orijinal metin no: [6b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Çelebi b. Menteş’in Rus asıllı câriyesini vasiyyet yoluyla azat etmesi Udûlden el-Hâc İlyas b. Mustafa ve Nasuh b. Hızır nâm kimesneler, hâric-i mahmiye-i Galata’da vâki‘ el-Hâc Memi mahallesinde sâkin iken bundan akdem vefât eden merhûm râcil Hasan Çelebi b. Menteş’in Râbia nâm sagīre kızına kıbel-i şer‘den mansûb vasî olan, husûs-ı âti’l-beyânı münkir, fahrü’l-akrân Mehmed Bey b. Ali mahzarında, orta boylu, açık kaşlı, elâ gözlü, sarışın, Rûsiyyetü’l-asl, hâmiletü hâze’l-kitâb Mehlika bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müteveffâ-i mezbûr hâl-i hayâtında, câriye-i mezbûre taht-ı mülkiyyetinde iken, mevtimden sonra hürsün diyerek mezkûre câriyeyi mutlak tedbîrle tedbîr eyledi. El-ân mezbûr Hasan Çelebi vefât edip rabbine kavuştu. Câriye-i mezbûre bu sûretle sâir harâir-i asliyyât gibi sülüs-i malından âzâd oldu. Tereke de âzâda kâfîdir. Şehâdetleri ba‘de’t-ta‘dîli’ş-şer‘î ve’t-tezkiyyeti’ş-şer‘iyye inde’ş-şer‘ makbûl ve mu‘teber olmağın ale’l-vechi’l-meşrûh mûcebince hükm edildi. Cerâ zâlike ve hurrire fî evâsıtı Muharremi’l-harâm sene selâse ve ışrîn ve elf. Şuhûdü’l-hâl: El-Hâc Abdi [b.] İbrahim, Abdurrahman Çelebi [b.] Süleyman, (...), Mahmud Çelebi [b.] İsa, Süleyman b. Mehmed