Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 57 Hüküm no: 30 Orijinal metin no: [12a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamer bt. Abdullah’ın terekesinin satılıp bedelinin beytülmâle teslim olunması Mahmiye-i Galata’da hâlâ beytülmâl emîni olan Murad Ağa b. Abdürrahim tarafından husûs-ı âti’z-zikre vekîl olup, nehc-i şer‘î üzre vekâleti sâbite olan Mehmed Bey b. Mustafa nâm cündî meclis-i şer‘de mahmiye-i merkūme dâhilinde Sultan Bayezid mahallesi sâkinelerinden râfi‘atü’l-kitâb Saliha bt. Yusuf mahzarında ikrâr ve takrîr-i kelâm edip, mahalle-i merkūmede vefât eden Kamer bt. Abdullah nâm hâtunun vâris-i ma‘rûfu olmayıp cümle terekesi beytülmâle âid olmağın, terekesinden ve dört köhne yorgan ve üç kıt‘a iplik ve bir köhne ferâce ve bir köhne alaca kaftan ve bir köhne beyt sandığı ve bir bakraç ve iki tencere ve iki sahan ve bir tepsi ve bir satır ve iki döşek ve iki köhne minder ve iki köhne yastık ve bir maşraba ve üç köhne kilim ve bir şamdan ve bir bıçak ve bir taş ve bir köhne çarşaf bu cümle esbâbı ba‘de’l-müzâyede merkūme Saliha’ya vekâletim hasebi ile safka-i vâhide ile bin akçeye bey‘ edip, teslîm-i mebî‘ ve kabz-ı semen eyledim dedikde, mâ hüve’l-vâki‘ gıbbe’t-tasdîk ve’t-taleb kayd olundu. Tahrîren fi’l-yevmi’l-hâmis aşer min Safer li sene 1023. Şuhûdü’l-hâl: El-Hâc Mehmed Efendi el-İmâm, Mehmed Çelebi el-Müezzin, Mustafa Beşe [b.] Abdullah Râcil, Memi Reis [b.] Abdullah, Şaban [b.] Abdullah, Hasan Beşe [b.] Abdullah, üstâd Ali [b.] İvaz, Şaban Efendi [b.] Mustafa, Mustafa Efendi el-Mülâzım ve gayruhüm.