Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 58 Hüküm no: 32 Orijinal metin no: [12b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Mahmud’un Ahmed b. Süleyman’ın vârisi olduğu Vilâyet-i Anadolu’da vâki‘ Pazarsuyu kazâsı sükkânından Receb b. Himmet ve Yakub b. Lütfullah ve Şaban b. Halil nâm kimesneler, mahmiye-i Galata ve tevâbi‘inde vâki‘ beytülmâlin emîni olan fahrü’l-akrân Murad Ağa b. Abdurrahman kıbelinden husûs-i âti’z-zikre vekâleti nehc-i şer‘î üzre sâbit olan ve dâhil-i mahmiye-i mezbûrede vâki‘ Emekyemez mahallesinde bundan akdem vefât eden merhûm Ahmed b. Süleyman’ın muhallefâtına vekâlet-i mahkiyesi hasebiyle vâzı‘-ı yed olan, husûs-ı âti’l-beyânı münkir vekîl Mehmed Bey b. Mustafa el-Cündî mahzarında, hâmil-i hâze’l-kitâb Mustafa b. Mahmud’dan sâdır olan da‘vâ-yı sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, müdde‘î-i mezbûr, müteveffâ-i mezbûr Ahmed’in usûbe-i nesebiyye cihetiyle vârisidir. Zira müdde‘î-i mersûm, mezbûr Mahmud’un sulbî oğludur mezbûr Mahmud da Taşkun’un sulbî oğludur; mezkûr Taşkun da Habil’in sulbî oğludur. Müteveffâ-i mezbûr, merkūm Süleyman’ın sulbî oğludur; mesfûr Süleyman da Ramazan’ın sulbî oğludur. Merkūm Ramazan ve mezkûr Taşkun ana-baba bir karındaşdırlar; babaları mezbûr Habil’dir ki o büyük dededir. Verâseti ona ve baba-bir kız karındaşı Şâhî Hâtun bt. Süleyman el-mezbûr nâm hâtuna münhasırdır. İkisinden başka vârisi ve terekeye müstehık kimesne ma‘lûmumuz değildir. Şehâdetleri ba‘de’t-ta‘dîli’ş-şer‘î ve’t-tezkiyyeti’ş-şer‘iyye inde’ş-şer‘ makbûl ve mu‘teber olmağın mûcebince hükm edildi. Cerâ zâlike ve hurrire fî evâhiri Saferi’l-hayr sene selâse ve ışrîn ve elf. Şuhûdü’l-hâl: El-Hâc Hasan b. Mahmud, el-Hâc Şaban b. Şehabeddin, Ahmed b. Halil, el-Hâc Rıdvan [b.] Abdullah, Mehmed Çelebi [b.] Hızır ve gayruhüm