Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 61 Hüküm no: 36 Orijinal metin no: [13b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aynî bt. Muharrem’in mehri ile bazı eşyalarını kocası Halil Reis b. Hasan’a hibe etmesi Hâric-i Galata’da Tophâne’de Çaşnigir mahallesi sâkinelerinden Aynî bt. Muharrem nâm hâtun meclis-i şer‘-i şerîfde, zevci râfi‘ü’l-kitâb Halil Reis b. Hasan tarafından ikrâr-ı âti’z-zikri tasdîka vekîl-i şer‘îsi olup, vekâleti hasm-ı şer‘î mahzarında nehc-i şer‘î üzre sâbite olan Siyâmi Reis b. Habib mahzarında ikrâr ve takrîr-i kelâm edip, zevcim mezbûr Halil Reis zimmetinde olan dört bin akçe mehr-i müeccelimin üç bin akçesini merkūm Halil Reis’e hibe eyledikden gayrı silk-i mülkümde olan iki döşek kılıfını ve iki minder kılıfını ve dört yastık kılıfını ve beş aded sahan ve bir sini ve iki börek tepsisini ve iki tencere ve bir güğüm ve bir maşraba ve bir el leğeni ve bir kaliçe ve bir Selânik keçesi zevcim mezbûr Halil Reis’e hibe-i sahîha-i şer‘iyye ile hibe ve teslîm edip, merkūm Halil Reis dahi eşyâ-i mezkûreyi vech-i muharrer üzre meclis-i hibede ittihâb ve kabz eyledi dedikde, mukırre-i mezbûrenin ikrâr-ı meşrûhunu vekîl-i merkūm Siyâmi Reis bi’l-muvâcehe tasdîk edip, mâ hüve’l-vâki‘ bi’t-taleb ketb olundu. Tahrîren fî evâsıtı şehri Rebî‘ilevvel li sene selâse ve ışrîn ve elf. Şuhûdü’l-hâl: Ali Çelebi b. Yusuf el-İmâm, Mehmed b. Ali el-Müezzin, Ahmed b. Lütfü, Veli b. Bâli el-Kayyım, Mustafa b. Cafer el-Kayyım, Süleyman Çelebi [b.] Mervan, el-Hâc Şaban er-Râcil, Receb Bey b. Hüseyin el-Bevvâb, Kemal Bey b. Hasan el-Bevvâb, Hasan b. Hüseyin, Ahmed b. Ali, [14a] Mehmed Beşe Râcil, Ali b. Abdullah, Abdullah [b.] Ali, Mehmed b. Hasan, Hasan Çelebi b. Süleyman Sarrâc ve gayruhüm.