Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 63 Hüküm no: 40 Orijinal metin no: [14b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Terekeye dahil diye el-Hâc Süleyman Çavuş b. Mehmed tarafından el konulan evin aslında Ahmed b. Abdullah tarafından karısına bağışlandığının sabit olması Dâhil-i mahmiye-i Galata mahallâtından el-Hâc A‘mâ mahallesi sükkânından olan Cafer Reis b. Abdullah ve el-Hâc Mustafa b. el-Hâc Yusuf nâm kimesneler meclis-i şer‘-i şerîfde hâzırân olup, kendi nefsinden asâleten ve Mehmed, İbrahim ve Râbia nâm çocuklarına kıbel-i şer‘-i şerîfden mansûb vasî olarak vesâyeten hâzır bulunan ve vasiyy-i mezbûrun zevcesi ve sıgār-ı mezbûrînin anneleri olan Âişe bt. Abdullah nâm hâtundan sıgār-ı mezkûrîne intikāl ettiği zu‘mu ile âti’z-zikr menzile asâleten ve vesâyeten vaz‘-ı yed olan husûs-ı âti’l-beyânı münkir el-Hâc Süleyman Çavuş b. Mehmed nâm hasm-ı câhid mahzarında, mahalle-i mezbûrede bundan akdem vefât eden merhûm Ahmed b. Abdullah’ın zevcesi ve vârisi olan hâmile-i hâze’l-kitâb Emine Hâtun bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, müteveffâ-i merkūm, mahalle-i mezbûrede kâin bulunan ve fevkānî iki beyti ve helâyı hâvî, bir tarafdan Hasan b. ( ) mülkü, diğer tarafdan Hüseyin Çelebi b. ( ) mülkü, öteki tarafdan Cafer Reis b. Abdullah mülkü ve diğer tarafdan da tarîk-ı âm ile mahdûd olan menzil-i mezbûru cümle tevâbi‘i ve kâffe-i menâfi‘i ile hâl-i hayâtı ve kemâl-i akl ve sıhhatinde müdde‘iye-i mezbûreye hibe etti; o da hibeyi kabûl etti. Şehâdetleri ba‘de’t-ta‘dîli’ş-şer‘î ve’t-tezkiyyeti’ş-şer‘iyye inde’ş-şer‘ makbûl ve mu‘teber olmağın mûcebince hükm edildi. Cerâ zâlike ve hurrire fî evâhiri şehri Rebî‘ilevvel li sene selâse ve ışrîn ve elf. Şuhûdü’l-hâl: Derviş b. Hızır üstâd, Mehmed Çelebi b. el-Hâc Rıdvan, Mustafa el-Muhzır, İbrahim el-Muhzır, Ali b. Abdullah ve gayruhüm