Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 85 Hüküm no: 68 Orijinal metin no: [27a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Mehmed’in hastalığının tedavisi için nâzırı tarafından vasîsine para verilmesi Mahmiye-i Galata tevâbi‘inden kasaba-i Kasımpaşa’da bundan akdem vefât eden Mehmed nâm kimesnenin sulbî oğlu Mustafa’nın kıbel-i şer‘den mansûb vasîsi olan işbu hâfızü’l-kitâb el-Hâc İbrahim b. Nureddin mahfil-i şer‘-i şerîfde, mezbûr Mustafa’nın kıbel-i şer‘den nâzırı olan Kurd Reis b. Sinan mahzarında takrîr-i kelâm edip, merkūm Mustafa el-iyâzü billâhi’l-azîm frengi zahmetine mübtelâ olup yevmen fe-yevmen marazı izdiyâd ve terakkī üzredir acele üzre ilâca sa‘y olunmazsa, helâkine bâ‘is ve bâdî olacağında iştibâh yoktur. Bî-garaz ehl-i vukūf müslümanlardan tefahhus olunup, her ne mikdâr akçe takdîr ederler ise kendi malından harc ve sarf mu‘âlece olunsun dedikde, zeyl-i kitâbda mastûrü’l-esâmî olan kimesneler mezbûr Mustafa’ya fi’l-vâki‘ maraz-ı mezbûr isâbet edip, ilâca eşedd-i ihtiyâcla muhtâcdır ve ifâkat bulunca nafaka ve ilâc ve hizmet-i tabîbe iki bin akçe vefâ eder deyû ihbâr eylediklerinde, vasiyy-i mezbûra meblağ-ı mezbûr iki bin akçenin harc ve sarfına ma‘rifet-i nâzır ile cânib-i şer‘den izin verildiği, gıbbe’t-taleb kayd-ı sicil olundu. Fi’t-târih. Şuhûdü’l-hâl: Yusuf b. Mehmed, Hakkı b. Abdullah, el-Hâc Mustafa b. Abdullah, Hüseyin Reis b. İbrahim, Ahmed Halîfe el-Müezzin.