Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 103 Hüküm no: 96 Orijinal metin no: [34b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kerime bt. Süleyman’ın babasından intikal eden evdeki hissesini Mehmed Çelebi b. Süleyman’a sattığının sabit olması Udûlden fahrü’l-eşbâh Mustafa Bey b. Behram ve Bâb-ı sultânîde bevvâb olan Mustafa Bey b. İbrahim nâm kimesneler, Süleyman nâm sagīr oğluna, hâric-i mahmiye-i Galata’da vâki‘ Tophâne mahallâtından İlyas Çelebi mahallesinde bundan akdem vefât eden Kerime bt. Süleyman nâm annesinden irs-i şer‘le kendisine intikāl eden emvâlin muhafazası için kıbel-i şer‘den mansûb vasî olan fahrü’l-akrân Davud b. Abdülmennân Kāid-i sultânî mahzarında ve ayrıca müteveffât-ı mezkûre Kerime’nin annesi ve vârisi olan Hâtun bt. Mehmed nâm hâtun mahzarında meclis-i şer‘de hâzırân olup, hâmil-i hâze’l-kitâb Mehmed Çelebi b. Süleyman’dan sâdır olan da‘vâ-yı sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, Kerime nâm mezkûre hâtun hâl-i hayâtı ve sıhhatinde ve kemâl-i aklında iken müteveffâ-yı mezbûr babasından kendisine intikāl eden, mahalle-i mezbûrede kâin olup bir tarafdan Ahmed Ağa vakfı, iki tarafdan tarîk-ı hâs ve diğer tarafdan da tarîk-ı âm ile mahdûd olan ve tahtânî ve fevkānî ikişer beyti, selâmlığı, helâyı, meyve ağaçlı avluyu müştemil bulunan menzilin sekizde bir hisse-i şâyi‘asını râyicü’l-vakt sekiz bin üç yüz otuz üç akçeye müdde‘î-i mezbûra îcâb ve kabûlü hâvî bey‘-i sahîh ile bey‘ etmiş idi. Şehâdetleri ba‘de’t-ta‘dîli’ş-şer‘î ve’t-tezkiyyeti’ş-şer‘iyye inde’ş-şer‘ makbûl ve mu‘teber olmağın mûcebince hükm edildi. Cerâ zâlike fi’t-târihi’l-mezbûr fî evâili Recebi’l-mürecceb sene selâse ve ışrîn ve elf. Şuhûdü’l-hâl: Receb Efendi el-İmâm, Receb Bey [b.] Abdullah, Bayram Bey [b.] Abdullah ve gayruhüm