Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 104 Hüküm no: 98 Orijinal metin no: [35a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Davud Çavuş b. Abdullah’ın alacak hususunda Mehmed Çelebi b. Süleyman ile sulh olması Dergâh-ı âlî çavuşlarından Davud Çavuş b. Abdullah hâric-i Galata’da Nevbethâne kurbunda İlyas Çelebi mahallesi sükkânından Mehmed Çelebi b. Süleyman muvâcehesinde meclis-i şer‘-i şerîfde takrîr-i kelâm edip, bundan akdem mezbûr Mehmed Çelebi’nin mülkü olup mahalle-i mezbûrede vâki‘ sâkin olduğumuz menzilin ba‘zı yerleri harâba müşrif olup, imâreti lâzım ve mühim olmağın, mezbûr Mehmed Çelebi ma‘rifetiyle kendi malımdan beş bin akçe mikdârı meblağ harc edip imâret ettirmiş idim. El-hâletü hâzihî meblağ-ı mezbûru merkūm Mehmed Çelebi’den da‘vâ ve taleb sadedinde iken müslimûn-ı muslihûn tavassutu ile üç bin akçeye beynimizde müsâlaha vâki‘ olup, bedel-i sulh olan üç bin akçeyi mezbûr Mehmed Çelebi yedinden bi’t-tamâm ahz edip mâ‘adâsından zimmetini ibrâ ve ıskāt eyledim dedikde, ol ki vâki‘ hâldir gıbbe’t-taleb ketb olundu. Fi’t-târihi’l-mezbûr. Şuhûdü’l-hâl: Mustafa Bey b. Behram el-Bevvâbü’s-sultânî, diğer Mustafa Bey b. İbrahim el-Bevvâbü’s-sultânî, Mevlânâ Mehmed b. Şaban el-İmâm, Musa b. İbrahim.