Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 151 Hüküm no: 162 Orijinal metin no: [56b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mümine bt. Murad’ın vefât eden kocasında mehr-i müeccel alacağının sabit olduğu Osman Bey b. Abdullah ve Ferhad Beşe b. Abdullah nâm kimesneler, hâl-i hayâtında mahmiye-i Galata müzâfâtından İstinye kasabası mahallâtından Kürkçübaşı mahallesinde sâkin iken bundan akdem Azak kasabasında vefât eden Pîr İlyas lakablı Mustafa Beşe er-Râcilin Âişe bt. Mustafa nâm sagīre kızına kıbel-i şer‘den mansûb vasî olan Osman Efendi b. el-Hâc Pîrî nâm âti’z-zikri münkir hasm-ı câhid mahzarında, merhûm-i mezbûrun zevcesi olan hâmiletü hâze’l-kitâb Mümine bt. Murad’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, merhûm-i merkūm Mustafa Beşe, hâl-i hayâtı ve sıhhatinde bizim yanımızda ve katımızda, üzerinde ve zimmetinde lehine şâhidlik yapılan mezbûre Mümine hâtunun, nikâhında ta‘ahhüd ettiği râyicü’l-vakt yirmi dört bin akçe mehr-i müeccel alacağı olduğunu ikrâr etmişdi. Müdde‘iye-i mezbûreye, meblağ-ı merkūmu kısmen ya da tamâmen müteveffâ-yı mesfûrdan almadığına, hibe etmediğine, zimmetini ibrâ etmediğine ve bi vechin mine’l-vücûh ıskāt etmediğine dâir yemîn verilmesinden sonra, şehâdetleri ba‘de’t-ta‘dîli’ş-şer‘î ve’t-tezkiyyeti’ş-şer‘iyye inde’ş-şer‘ makbûl ve mu‘teber olmağın hâkim şehâdetleri mûcebince meblağ-ı mezbûrun muhallefât-ı merkūmdan müdde‘iye-i mezbûreye edâsına hükm etti. Cerâ zâlike ve hurrire fi’l-yevmi’t-tâsi‘ min Zilka‘de sene selâse ve ışrîn ve elf. Şuhûdü’l-hâl: Mehmed Ağa b. Nasuh, Mehmed Bey b. Abdurrahman, Hüseyin Bey b. Abdullah, Mehmed Çelebi b. Mehmed, Ali Bey b. Abdullah, Ali Çelebi b. ( ) ve gayruhüm.