Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 32 Hüküm no: 4 Orijinal metin no: [2b-2 Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fahri Hâtun’un Rus asıllı câriyesini azat ettiği Hâlen Mekke-i mükerremede -şerrefaha’llâhü te‘âlâ- sâkine olan Hâcce Fahri Hâtun bt. ( ) kıbelinden hasm-ı câhid mahzarında âti’l-beyân âzâd ikrârına vekâleti kendisini ma‘rifet-i şer‘iyye ile ârifân olan el-Hâc Receb b. Yunus ve el-Hâc Davud b. Mehmed nâm kimesnelerin şehâdetleri ile sâbit el-Hâc Muharrem b. Veli meclis-i şerî‘at-ı şerîfe-i garrâ ve mahfil-i tarîkat-i münîfe-i zehrâya hâzır olup müvekkile-i mezbûresinin, kendisine rıkkını mu‘terife olan uzun boylu, sarışın, açık kaşlı, gök gözlü, Rûsiyyetü’l-asl hâmiletü hâze’l-kitâb Nâzenin bt. Abdullah nâm câriye-i memlûkesini hasbeten lillâhi te‘âlâ ve taleben li merzâtihî yevme yestezıllu’l-mer’u tahte zılli sadakātihî âzâd ve tahrîr ettiğini bi’l-vekâle ikrâr ve i‘tirâf eyledi. Câriye-i mezkûre bu sûretle sâir harâir-i asliyyât-ı mükellefât gibi hürre oldu. Mevâlînin utekā üzerinde şer‘an sâbit olan velâ hakkından gayrı üzerinde kimesnenin bir hakkı kalmadı. Cerâ zâlike ve hurrire fî evâsıtı şehri Rebî‘ilevvel li sene erba‘a ve ışrîn ve elf. Şuhûdü’l-hâl: Receb Efendi b. Abdullah, Davud Halîfe b. Yunus, Ramazan Çelebi b. Memi, Veli b. Abdullah el-Câbi, Mahmud Çelebi b. Mustafa, Hasan Çelebi b. Ramazan, Mustafa b. Hayrullah el-Müezzin ve gayruhüm