Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 36 Hüküm no: 9 Orijinal metin no: [4a-2 Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Davud’un Eflak asıllı câriyesini azat ettiği Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Dökümcübaşı mahallesinde sâkine olan fahrü’l-muhadderât tâcü’l-mestûrât Sâliha bt. Davud Bey el-merhûm kıbelinden âti’z-zikr âzâd ve tahrîr ikrârına vekâleti el-Hâc Mustafa b. Mehmed ve Ahmed Bey b. Abdullah en-Nâzır nâm kimesnelerin şehâdetleri ile sâbit olan fahrü’l-a‘yân Mustafa Bey b. Abdülmennân meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzır olup müvekkile-i mezbûrenin, kendisine rıkkını mu‘terife olan, açık kaşlı, elâ gözlü, orta boylu, Eflakiyyetü’l-asl hâmiletü hâze’l-kitâb Kâmile bt. Abdullah nâm câriye-i memlûkesini hasbeten lillâhi’l-aliyyi’l-azîm ve taleben li merzâti rabbihi’l-kerîm âzâd ve tahrîr ettiğini bi’l-vekâle ikrâr ve i‘tirâf eyledi. Câriye-i merkūme bu sûretle sâir harâir-i asliyyât-ı mükellefât gibi hürre oldu. Mevâlînin utekā üzerinde şer‘an sâbit olan velâ hakkından gayrı üzerinde kimesnenin bir hakkı kalmadı. Cerâ zâlike ve hurrire fî evâsıtı şehri Rebî‘ilevvel sene erba‘a ve ışrîn ve elf. Şuhûdü’l-hâl: Mehmed b. Himmet, Mehmed Dede eş-Şeyh, Osman b. Himmet, Hasan Bey b. Abdullah, Ali Beşe b. Abdullah ve gayruhüm