Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 63 Hüküm no: 36 Orijinal metin no: [14b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa’nın kardeşi müteveffâ Halil Ağa’nın Uskumru’daki çiftliğinde hakkı olmadığı Medîne-i Hazret-i Ebî Eyyûb-i Ensârî’de Câmi‘-i şerîf mahallesi sâkinlerinden iken bundan akdem vefât eden Halil Ağa’nın karındaşı Ahmed Ağa ez-Zevvâku’s-Sultânî müteveffâ-yı mezbûrun zevcesi ve sagīr oğlu Mehmed ve sagīre kızı Fâtıma’nın vasiyy-i şer‘îsi fahrü’l-muhadderât Âişe Hâtun bt. Ahmed Efendi tarafından tasdîk-i âtîde vekâleti şer‘an sâbite olan Ahmed Çavuş b. Hasan muvâcehesinde takrîr-i kelâm edip medîne-i mezbûre tevâbi‘inden Uskumru nâm karyede vâki‘ karındaşım müteveffâ-yı mezbûr Halil Ağa’yı intimâ ile tahrîrden müstağnî çiftliğin kıymetinde benim dahi bir mikdâr hakkım olmak zu‘mu ile da‘vâ ve nizâ‘dan hâlî değil idim. El-hâletü hâzihî kat‘an hakkım olmayıp min ba‘d çiftlik sırf merhûm-i mezbûr Halil Ağa’nın idi ki ma‘lûmum olduğu cihetden da‘vâ ve nizâ‘dan fâriğ olup min ba‘d çiftlik müteveffâ-yı merkūm Halil Ağa’nın veresesine intikāl edip hakk-ı sırflarıdır, min ba‘d benden da‘vâ sudûr ederse lede’l-hükkâm mesmû‘a olmaya dedikde mâ vaka‘a kayd olundu fi’t-târihi’l-mezbûr. Şuhûdü’l-hâl: Ali Ağa b. Eymirşâh ez-Zevvâku’s-Sultânî, Ahmed Efendi b. İbrahim el-Kâtib, Hacı Efendi el-Kadı, Mustafa b. Mehmed, Mehmed Paşa b. Mustafa er-Râcil, Hasan Bey b. Abdullah el-Bevvâbü’s-sultânî