Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 104 Hüküm no: 87 Orijinal metin no: [33b-3 Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Haydar’ın Gürcü asıllı kölesini vasiyet yoluyla azat ettiği Udûlden Mustafa Halîfe b. Mehmed el-İmâm ve Hüseyin Çelebi b. Sefer nâm kimesneler meclis-i şer‘-i şerîfe hâzırân olup hâric-i mahrûse-i Galata mahallâtından el-Hâc Memi mahallesinde sâkin iken bundan akdem vefât eden el-Hâc Haydar b. Abdullah’ın zevcesi ve vârisi olan ve verâset-i mahkiyesi hasebiyle âti’z-zikr gulâma vâzı‘-ı yed bulunan Kerime Hâtun bt. Süleyman nâm husûs-ı âti’z-zikri inkâr eden hasm-ı câhid mahzarında, orta boylu, kara gözlü, beyaz tenli, Gürciyyü’l-asl hâmil-i hâze’l-kitâb Mehmed b. Abdülvehhâb’dan sâdır olan da‘vâ-i sahîha-i şer‘iyyede gıbbe’l-istişhâd şöyle şehâdet ettiler ki, merhûm-ı mezbûr hâl-i hayâtı [34a] ve sıhhatinde bizim yanımızda ve katımızda kendisine rıkkını mu‘terif olan müdde‘î-i merkūmu mevtimden kırk gün mukaddem hürsün diyerek tedbîr-i mukayyed ile tedbîr eyledi ve müddet-i merkūmeden ziyâde yaşadı. El-ân mezheb-i muhtâra tevfîkan efendisinin cemî‘ mâlından sâir ahrâr-ı asliyyîn gibi hürdür. Ve hurrire fi’t-târihi’l-mezbûr. Şuhûdü’l-hâl: Ahmed Bey b. Mahmud et-Tâcir, Haydar Ağa b. Abdülmennân, el-Hâc Süleyman [b.] Abdullah, Rıdvan Beşe [b.] Abdullah, Hasan Beşe [b.] Yusuf, Murad b. Abdullah, Receb b. Abdullah, Mustafa el-Muhzır, İbrahim el-Muhzır ve gayruhüm