Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 107 Hüküm no: 91 Orijinal metin no: [35a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâl emîni Mehmed Ağa b. Mahmud’un beytülmâle ait menzil hissesi davasının reddi Dergâh-ı âlî yeniçeri tâifesi beytülmâli emîni olan fahrü’l-a‘yân Mehmed Ağa b. Mahmud meclis-i şer‘-i şerîfe mahmiye-i Galata tevâbi‘inden Tophâne’de Muhyiddin Efendi mahallesi sükkânından iken vefât eden Rüstem Beşe b. Abdullah nâm râcilîn zevce-i metrûkesi ve vârisesi olup âti’z-zikr olan menzile vâzı‘atü’l-yed idiği şer‘an sâbit olan Ceyhun Hâtun bt. Abdülmennân’ı ihzâr ve üzerine takrîr-i da‘vâ edip merkūm Rüstem Beşe’nin zevcesi mezbûreden gayrı zâhirde vâris-i ma‘rûfu olmamağla cümle terekesinin rub‘u zevcesi mezbûreye ve mâ‘adâsı cânib-i beytülmâle âid olmağın müteveffâ-yı mezbûrun terekesinden olup mahalle-i mezbûrede vâki‘ bir tarafı Sâliha Hâtun mülkü ile ve iki tarafı tarîk-i hâs ile ve bir tarafı tarîk-i âm ile mahdûd olup üç bâb fevkānî ve iki bâb tahtânî evleri ve cüneyneyi ve bi’r-i mâyı müştemil olan menzilin rub‘u zevcesi mezbûreye ve mâ‘adâsı cânib-i beytülmâle âid olmuşken mezbûre Ceyhun Hâtun menzil-i mârrü’z-zikrin selâse-i erbâ‘ına dahi vâzı‘atü’l-yed olup cânib-i beytülmâl için bana teslîmden imtinâ‘ eyler, suâl olunup kasr-ı yed ettirilmesi matlûbumdur dedikde gıbbe’s-suâl mezbûre Ceyhun Hâtun cevâbında fi’l-vâki‘ menzil-i mezkûr zevcim müteveffâ-yı mezbûrun mülkü idi, lâkin hâl-i hayâtında menzil-i merkūmu bana ve kendi mu‘takı olan Yusuf b. Abdullah’a vakf edip zikr olunan fevkānî odaların ve bir tahtânî odanın süknâsını ve ben öldükden sonra evlâdıma ba‘dehüm onların evlâdına bu tertîb üzre evlâd-ı evlâda ve ba‘de’l-inkırâz zikr olunan odaların icâresi Medîne-i münevvere fukarâsına olmak üzre şart edip ve bir tahtânî evin süknâsını dahi mezbûr Yusuf’a ve ba‘dehû evlâdına ve ba‘dehüm onların evlâdına bu tertîb üzre evlâd-ı evlâda ve ba‘de’l-inkırâz kezâlik Medîne-i münevvere fukarâsına olmak üzre şart edip ve vakf-ı mezbûru vech-i muharrer üzre ikrâra ve li ecli’t-tescîl rücû‘a fahrü’l-eimme Hüseyin Efendi b. İslâm’ı vekîl edip ol dahi Tophâne mahallesinde hilâfete müvellâ olan mevlânâ Abdullah Efendi b. eş-Şeyh Süleyman huzûrunda vech-i muharrer üzre vakf-ı mezbûru ikrâr edip ba‘dehû tescîl-i şer‘î olunmuşdur deyû takrîr-i meşrûhunu mütezammına ve mevlânâ-yı mezbûrun imzâ ve hatmi ile mümzâ ve mahtûm vakfiye-i ma‘mûlun bihâ ibrâz edip nazar olundukda min külli’l-vücûh mazmûnu takrîrine muvâfık bulunup emîn-i mezbûr istintâk olundukda mazmûnunu münkir olup mezbûre Ceyhun Hâtun’dan beyyine taleb olundukda udûl-i müslimînden Mustafa Çelebi b. Ali ve Ahmed Beşe b. Abdullah nâm kimesneler li ecli’ş-şehâde mahfil-i şer‘a hâzırân olup ba‘de’l-istişhâd fi’l-vâki‘ mezbûr Rüstem Beşe hâl-i hayâtında menzil-i merkūmu vech-i muharrer üzre bizim huzûrumuzda vakf edip [35b] ve ba‘dehû mezbûr Hüseyin Efendi’ye vakf-ı merkūmu vech-i muharrer üzre ikrâra ve rücû‘a vekîl edip ol dahi bi hasebi’l-vekâle Tophâne mahkemesinde hâkim-i mûmâ-ileyh huzûrunda vech-i meşrûh üzre vakf-ı merkūmu ikrâr ve ba‘de’d-da‘vâ ve’l-istircâ‘ hâkim-i müşârün-ileyh dahi vakfiyetine hükm eyledi, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebi ile hükm olundu. Hurrire fî evâhiri Cumâdelâhire li sene sitte ve ışrîn ve elf Şuhûdü’l-hâl: Mustafa Ağa Kethüdâ-i sarây-ı atîk, Mustafa Çelebi b. Mehmed el-Bevvâb, Ali Bey b. Cafer el-Bevvâb, bölükbaşı Ahmed Beşe, İbrahim Bey el-Bevvâb, Mustafa el-Muhzır ve gayruhüm