Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 126 Hüküm no: 114 Orijinal metin no: [44a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Abdullah’ın menzilinin zevcesi Rahime bt. Mehmed ve beytülmâl tarafından Ramazan Halîfe b. Cafer’e satıldığı Mahmiye-i İstanbul’da bi’l-fi‘l Yeniçeri tâifesi beytülmâl emîni olan fahrü’l-akrân Mehmed Ağa b. Mahmud meclis-i şer‘-i şerîfde işbu râfi‘ü’l-kitâb Ramazan Halîfe b. Cafer muvâcehesinde ikrâr ve takrîr-i kelâm edip mahmiye-i mezbûre hısnı ebvâbından Yenikapı hâricinde Merkez Efendi mahallesinde sâkin olup Şark seferinde müteveffâ olan merhûm Hasan Beşe b. Abdullah nâm râcilîn zâhirde zevcesi Rahime bt. Mehmed nâm hâtundan gayrı vâris-i ma‘rûfu olmamağla cümle terekesinin rub‘u zevcesi mezbûreye ve selâse-i erbâ‘ı cânib-i beytülmâle âid olmağın müteveffâ-yı mezbûrun terekesinden olup mahalle-i mezbûrede vâki‘ bir tarafı Selime Hâtun ve Sâliha Hâtun mülkleri ile ve bir tarafdan Hacer Hâtun bt. Hasan mülkü ile ve bir tarafdan Saraylı demekle ma‘rûf Hâtun mülkü ile ve bir tarafdan tarîk-i âm ile mahdûd olup iki fevkānî ve iki tahtânî evleri ve bi’r-i mâ ve kenîfi ve muhavvata ve bahçeyi müştemil olan menzilin selâse-i erbâ‘ına emânetim hasebi ile vaz‘-ı yed etmişdim, el-hâletü hâzihî menzil-i mârrü’z-zikrin selâse-i erbâ‘ı müddet-i medîde müzâyede olunup ve rağabât-ı nâs dahi bi’l-külliyye münkatı‘a oldukdan sonra mezbûr Ramazan Halîfe üzerinde sekiz bin dört yüz yetmiş beş akçeye karâr edip ziyâde ile tâlib-i âhar dahi olmamağın ben dahi emânetim hasebi ile menzil-i mezkûrun selâse-i erbâ‘ını mezbûr Ramazan Halîfe’ye meblağ-ı mezbûr sekiz bin dört yüz yetmiş beş akçeye bey‘-i bâtla bey‘ ve teslîm edip ol dahi vech-i muharrer üzre iştirâ ve tesellüm eyledikden sonra [44b] semen-i mezbûru bi’t-tamâm yedinden kabz eyledim, min ba‘d menzil-i mezbûrun selâse-i erbâ‘ı mezbûrun mülk-i müşterâsıdır dedikden sonra merkūme Rahime Hâtun dahi meclis-i şer‘de mezbûr Ramazan Halîfe muvâcehesinde kezâlik ikrâr edip ben dahi zevcim müteveffâ-yı mezbûrdan menzil-i mezkûrdan bana âid olan rub‘ hisse-i şer‘iyyemi mezbûr Ramazan Halîfe’ye iki bin sekiz yüz yirmi beş akçeye bey‘-i bâtt-ı sahîh ile bey‘ ve teslîm eyledim ol dahi vech-i muharrer üzre iştirâ ve kabz ve tesellüm eyledikden sonra yedinden semen-i mezbûru bi’t-tamâm alıp kabz eyledim, min ba‘d rub‘-ı mezkûr mezbûrun mülk-i müşterâsıdır keyfe mâ yeşâ’ ve yahtâr mutasarrıf olsun dedikde mukırrîn-i mezbûrîni ikrâr-ı meşrûhlarında mezbûr Ramazan Halîfe dahi bi’l-muvâcehe tasdîk edip mâ hüve’l-vâki‘ bi’t-taleb ketb olundu. Hurrire fî evâhiri şehri Şa‘bâni’l-mu‘azzam li sene sitte ve ışrîn ve elf Şuhûdü’l-hâl: İbrahim Halîfe b. Burhan el-İmâm, Receb b. Ahmed el-Müezzin, İbrahim b. Abdi er-Râcil, Mehmed b. Abdi er-Râcil, Mustafa b. Mehmed el-Muhzır, İbrahim el-Muhzır, kâtibü’l-hurûf Şeyhî, Ali Çelebi b. Bâli ve gayruhüm