Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 129 Hüküm no: 117 Orijinal metin no: [45a-2 Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan Reis’in Rus asıllı kölesini vasiyetle azat ettiği Udûlden el-Hâc Süleyman b. Abdullah ve Haydar Ağa b. Abdülvehhâb nâm kimesneler meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırân olup, hâl-i hayâtında dâhil-i mahrûse-i Galata mahallâtından Yolcuoğlu mahallesinde sâkin iken bundan akdem Karadeniz’de şehîden vefât eden Rıdvan Reis b. Abdullah’ın zevcesi ve vârisi olup verâset-i mahkiyesi hasebiyle âti’l-beyân gulâma vâzı‘atü’l-yed olan ve husûs-ı âti’z-zikri münkir bulunan Üftâde Hâtun bt. Abdullah nâm hasm-ı câhid mahzarında, orta boylu, elâ gözlü, açık kaşlı, Rûsiyyü’l-asl râfi‘-i hâze’l-kitâb Ali b. Abdullah’dan sâdır olan da‘vâ-i sahîha-i şer‘iyyede gıbbe’l-istişhâd şöyle şehâdet ettiler ki, merhûm-ı mezbûr hâl-i hayâtında ve kemâl-i sıhhatinde müdde‘î-i mezbûru “Mevtimden kırk gün mukaddem hürsün” diyerek bizim yanımızda ve katımızda tedbîr-i mukayyed ile müdebber eyledi ve müddet-i mezkûreden ziyâde yaşadı. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hükm edildi. El-ân müdde‘î-i merkūm mezheb-i muhtâra tevfîkan sâir ahrâr-ı asliyyîn gibi hürdür. Cerâ zâlike ve hurrire fi’t-târihi’l-mezbûr. Şuhûdü’l-hâl: Ahmed Çelebi b. Ali el-Müezzin, Usta Mehmed b. Şükrullah, Memi Ağa b. Abdullah, Ali Çelebi b. Veli, Mustafa el-Muhzır ve gayruhüm