Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 161 Hüküm no: 154 Orijinal metin no: [59b-2 Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nisâ Hâtun’un Nasuh Beşe’de ödünçten alacağı olduğu Dâhil-i mahmiye-i Galata mahallâtından el-Hâc A‘mâ mahallesi sükkânından udûlden Mehmed Halîfe b. Ali ve Musli Çelebi b. İbrahim nâm kimesneler meclis-i şer‘-i şerîfe hâzırân olup mahmiye-i Kostantıniyye ve mahrûse-i Galata’da vâki‘ râcilîn zümresine mahsûs beytülmâle bi’l-fi‘l emîn olan ve emânet-i mahkiyesi hasebiyle ve hâkim-i şer‘ ma‘rifeti ile dâhil-i Galata mahallâtından el-Hâc A‘mâ mahallesinde bundan akdem vefât eden merhûm Nasuh Beşe b. Abdullah nâm yayanın muhallefâtına zâhirde ma‘rûf vârisi zuhûr etmediği için vâzı‘-ı yed olan fahrü’l-ümenâ Mehmed Ağa b. Mahmud nâm hasm-ı câhid mahzarında, râfi‘atü hâze’l-kitâb Nisâ Hâtun bt. Murad’dan sâdır olan da‘vâ-i sahîha-i şer‘iyyede gıbbe’l-istişhâd şöyle şehâdet ettiler ki, müdde‘iye-i mezbûrenin müteveffâ-yı merkūmun zimmetinde karz-ı şer‘î cihetinden lâzımü’l-edâ ve vâcibü’l-kazâ râyicü’l-vakt iki yüz bin akçe-i Osmânî hakkı vardır. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber oldu. Müdde‘iye-i merkūmeye meblağ-ı mersûmu kendisinden veya vekîlinden kısmen veya tamâmen ahz ü kabz etmediğine ve bi vechin mine’l-vücûh zimmetini ibrâ eylemediğine dâir yemîn billâhi te‘âlâ verildiğinde hâkim-i muvakki‘ a‘lâ hâze’l-kitâb, meblağ-ı mezbûrun müteveffâ-yı merkūmun muhallefâtından müdde‘iye-i mezkûreye edâsına hükm etti. Müdde‘iye-i mezbûre sonra emîn-i merkūm mahzarında, hükm edilen akçeyi emîn-i mesfûr yedinden ahz u kabz ettiğini ikrâr etti. Emîn-i mezbûr, mukırra-i merkūmenin ikrâr-ı meşrûhunu vicâhen ve şifâhen tasdîk eyledi. Hurrire fi’t-târihi’l-mezbûr. Şuhûdü’l-hâl: Kemâ sebeka