Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 37 Hüküm no: 2 Orijinal metin no: [1b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Abdurrahman’ın varisleri olan kardeşleri Ahmed Ağa ile Ümmühâni Hâtun’un sulh oldukları Mahmiye-i Galata hâricinde Müeyyedzâde mahallesinde sâkin iken bundan akdem vefât eden Mehmed Çelebi b. Abdurrahman nâm kimesnenin verâseti li ebeveyn er karındaşı fahrü’l-akrân Ahmed Ağa’ya ve li ebeveyn kız karındaşı Ümmühâni nâm hâtuna münhasıra olduğu şer‘an mütehakkik oldukdan sonra mezbûre Ümmühâni Hâtun meclis-i şer‘-i şerîf-i lâzimü’t-teşrîfde karındaşı râfi‘ü hâze’l-kitâb mezbûr Ahmed Ağa mahzarında ikrâr-ı tâm ve takrîr-i kelâm edip mûrisimiz müteveffâ-yı mezbûr Mehmed Çelebi’nin akār ve urûz ve nukūd bi’l-cümle ism-i mâl ıtlâk olunur mecmû‘ eşyâsından bi hasebi’l-irsi’ş-şer‘î bana intikāl eden hisse-i şer‘iyyemden benimle şerâit-i sulhiyeyi câmi‘ ve mevâni‘den mücerred ve ârî tehârüc-i şer‘î tarîkiyle üç nakd-i fıddî râyic fi’l-vakt akçe üzerine sulh olup bedel-i sulh olan meblağ-ı mezbûr üç yük akçeyi bi’t-tamâm ahz ü kabz eyledim ba‘de’l-yevm karındaşım mezbûr Ahmed Ağa’nın zimmetini husûs-ı mezbûra müte‘allik da‘vâ ve mütâlebeden ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâlis min şehri Rebî‘ilâhir li sene ihdâ ve hamsîn ve elf. Şuhûdü’l-hâl: El-Hâc Mehmed b. Abdullah Odabaşı, Hasan Çelebi b. Zülfikār, Mehmed Efendi b. Ahmed el-İmâm, Ali Çelebi b. Hasan Efendi, Yahya Bey b. Abdullah, Dilâver b. Abdullah, Kenan b. Abdullah, Mehmed b. Osman, Mahmud b. Hüseyin Muhzır ve gayruhüm.