Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 147 Hüküm no: 111 Orijinal metin no: [34a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Ömer’in kocası Davud Beşe b. Mehmed’de olan mehir alacağının muhallefâtından ödenmesi Mahmiye-i Galata müzâfâtından olup Emekyemez mahallesinde sâkin iken vefât eden Davud Beşe b. Mehmed nâm müteveffânın zevce-i metrûkesi vârisesi Rahime bt. Ömer nâm hâtun meclis-i şer‘de beytül[mâl]-i âma ve’l-hâssa emîn olan Mehmed Çelebi b. İsa mahzarında da‘vâ edip merhûm-ı mezbûrun zimmetinde mehr-i müeccelimden züyûf iki bin akçe hakkım olup muhallefâtından alıverilmesin taleb ederim dedikde müdde‘iye-i mezbûrenin sıdk-ı makāline beyyine taleb olundukda udûl-i ricâlden Yusuf b. Mehmed ve yine udûl-i nisvândan Fâtıma bt. Abdullah ve Sâime bt. Abdullah nâm kimesneler li ecli’ş-şehâdet meclis-i şer‘a hâzırûn olup gıbbe’l-istişhâd fi’l-vâki‘ müdde‘iye-i mezbûrenin müteveffâ-yı mezbûr zimmetinde mehr-i müeccelinden iki bin züyûf akçe hakkı vardır, biz bu husûsa şâhidleriz, şehâdet dahi ederiz deyû edâ-i şehâdet-i şer‘iyye eylediklerinde ba‘de ri‘âyeti’ş-şerâit şehâdetleri makbûle oldukdan sonra meblağ-ı mezbûru müteveffâ-yı mezbûrun yedinden hâl-i hayâtında taraf-ı şer‘iyyeden bir tarîk ile alıp kabz ve kabûl etmediğine yemîn teklîf olundukda ol dahi alâ vefki’l-mes’ûl yemîn billâh ettikden sonra meblağ-ı mezbûru altından kıymeti edâ olunmak üzere gıbbe’t-taleb ketb olundu. Cerâ zâlike ve hurrire fi’l-yevmi’s-sâbi‘ min Muharremi’l-harâm sene isneteyn ve hamsîn ve elf. [34b] Şuhûdü’l-hâl: es-Seyyid Hasan b. İbrahim, Ahmed b. Mehmed, Mahmud b. İlyas ve gayruhüm mine’l-huzzâr.