Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 170 Hüküm no: 134 Orijinal metin no: [39b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Rıdvan Beşe’nin vasîsi Ali Beşe b. Cafer’e ücret tayini Mahmiye-i Galata mahallâtından Alaca Mescid mahallesinde sâkin iken bundan akdem vefât eden Rıdvan Beşe b. Cafer nâm müteveffânın sulbî oğlu Mehmed nâm sagīre vasiyy-i muhtâr olan işbu râfi‘ü’l-kitâb Ali Beşe b. Cafer nâm kimesne meclis-i şer‘-i hatîr-i lâzimü’t-tevkīrde takrîr-i kelâm ve ta‘bîr ani’l-merâm edip vasiyy-i muhtâr olduğumuz sagīr-i mezbûrun babası müteveffâ-yı mezbûrdan alâ tarîki’l-irsi’ş-şer‘î intikāl eden ma‘lûmü’n-nukūd akçesin sagīr-i mezbûra nef‘-i mahz olan yerlerde tasarrufa ve zimem-i nâsda olan akçeyi cem‘ ve cümle bunlar mütevakkıf olduğu umûrun cümlesini da‘vâ ve taleb için bi kaderi’z-zarûre hizmetim mukābelesinde ecr-i mislim vazîfe ta‘yîn olunması matlûbumdur dedikde kıbel-i şer‘-i mutahhardan beher yevm sagīr-i mezbûrun mâlından altışar akçe vazîfe ta‘yîn olundukda vasiyy-i merkūm vazîfe-i mu‘ayyeneyi kabûl ve hizmet-i lâzımesin edâya ta‘ahhüd eylemeğin mâ hüve’l-vâki‘ bi’t-taleb ketb olundu. Cerâ zâlike ve hurrire fi’l-yevmi’l-ışrîn min şehri Şevvâl li sene isneteyn ve hamsîn ve elf. Şuhûdü’l-hâl: Hasan b. Receb, Ali Beşe b. Hüseyin, Ali Osman Çelebi b. İbrahim, Mehmed Çelebi b. Ahmed, Mehmed Çelebi b. Ramazan.