Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 223 Hüküm no: 188 Orijinal metin no: [55a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Ağa b. es-Seyyid Mehmed’in evini Handan Beşe b. Abdullah’a satması Oldur ki mahrûse-i Kostantıniyye’de mahalle-i el-Hâc Küçük sükkânından olup şerîf-i muhterem nûr-ı hadîka-i Resûl-i ekrem es-Seyyid İbrahim Ağa b. es-Seyyid Mehmed nâm kimesne mahfil-i kazâda bâ‘isü’l-kitâb Handan Beşe b. Abdullah mahzarında bi’t-tav‘ ve’r-rızâ ikrâr ve i‘tirâf edip silk-i mülkünde münselik olup mahalle-i mezbûrede vâki‘ [bir] tarafı Süleyman Beşe mülkü ve bir tarafı mahalle-i mezbûre imâmına meşrût menzile ve bir tarafı tarîk-i hâs ile mahdûd olup iki bâb fevkānî ve bir tahta-pûşu ve bir bâb tahtânî ve bir ahırı ve bir kenîfi müştemil menzili mezbûr Handan’a sekiz bin nakd-i râyic fi’l-vakt akçeye bey‘-i bâtt-ı sahîh-i şer‘le bey‘ edip kabz-ı semen ve teslîm-i müsemmen eyledim ba‘de’l-yevm zikr olunan menzili mezbûr Handan sâir emlâki gibi mutasarrıf olsun dedikde mukırr-ı mezbûrun vech-i muharrer üzere cârî olan kelâmını el-mukarru lehü’l-merkūm Handan bi’l-muvâcehe tasdîk ve tahkīk edicek mâ vaka‘a bi’t-taleb ketb olundu. Hurrire fî evâili Cumâdelâhire li sene isneyn ve hamsîn ve elf. Şuhûdü’l-hâl: Durak Efendi el-İmâm, balcı Süleyman Beşe, Havancı Mehmed Beşe, Abdurrahman b. Hüseyin el-Bevvâbü’s-sultânî, Mustafa Çelebi b. Durak Efendi, Ömer Çelebi b. Ali Efendi ve gayruhüm.