Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 226 Hüküm no: 190 Orijinal metin no: [56a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Süleyman Paşa b. el-Hâc Mehmed’in evinin müzâyede ile satıldığı Mahmiye-i Galata’da Câmi‘-i Kebîr mahallesinde sâkin iken bundan akdem vefât eden merhûm Süleyman Paşa b. el-Hâc Mehmed’in zevce-i metrûkesi seyyidetü’l-muhadderât Havva Hâtun bt. el-Hâc Yusuf’dan gayrı zâhirde vâris-i ma‘rûfu olmayıp muhallefâtının rub‘u mezbûre Havva’ya ve selâse-i erbâ‘ı beytülmâle âid ve râci‘ olduğu bâ‘isden mahmiye-i mezbûrede bi’l-fi‘l âmme ve hâssa beytülmâline emîn olan kıdvetü’l-emâcid ve’l-ekârim Ali Ağa b. el-Hâc Mehmed vech-i muharrer üzere merhûm-ı mezbûrun muhallefâtına vâzı‘ü’l-yed olmağla müşârün-ileyh Ali Ağa tarafından husûs-ı âti’l-beyân bey‘i ikrâra vekîl olup vekâleti fahrü’l-a‘yân Mehmed Efendi b. Mustafa ve İbrahim Efendi b. Yusuf şehâdetleriyle sâbite olan fahrü’l-a‘yân ve’l-emsâl Hâfız Yusuf Efendi b. Abdülmün‘im nâm kimesne meclis-i şer‘de mezbûre Havva tarafından bey‘-i mezbûru ikrâra vekîl olup vekâleti nehc-i şer‘î üzere sâbite olan İbrahim Ağa b. Yusuf mahzarında bi’l-vekâle ikrâr ve i‘tirâf edip müteveffâ-yı mezbûrun muhallefâtından olup mahalle-i mezbûrede vâki‘ iki tarafı Mustafa Çelebi veresesi mülkleri ve bir tarafı tarîk-i hâs ile mahdûd olup üç bâb beyt-i ulvî ve bir bâb süflî ve bir matbahı ve dört sofayı ve bir kileri ve bir ahırı ve iki bi’r-i mâyı ve üç kenîfi müştemil menzilini sûk-ı sultânîde bey‘-i men yezîd olup rağabât-ı nâs bi’l-külliye münkatı‘a oldukdan sonra mezbûre Havva Hâtun üzerinde yetmiş bin akçede karâr edip ziyâde ile tâlibi olmamağın müşârün-ileyh Ali Ağa menzil-i mezbûru mezbûre Havva’ya meblağ-ı mezbûr yetmiş bin akçeye bey‘-i bâtt-ı sahîh-i şer‘ile bey‘ edip kabz-ı semen-i ma‘dûd ve teslîm-i müsemmen eyledi dedikde vekîl-i merkūm Hâfız Yusuf Efendi vech-i muharrer üzere cârî olan kelâmını el-mukarru lehü’l-merkūm İbrahim Ağa vicâhen tasdîk edip mâ vaka‘a bi’t-taleb ketb olundu. Hurrire fi’l-yevmi’l-âşir min Cumâdelûlâ li sene isneyn ve hamsîn ve elf. Şuhûdü[’l-hâl]: Es-Seyyid Mahmud Çelebi b. es-Seyyid Mehmed, Ali Çelebi b. Kasım, Mehmed Çelebi b. Hüseyin, el-Hâc Mehmed b. Abdullah, Mehmed Çelebi b. Mehmed, İbrahim Çelebi b. Mehmed, Fazlullah Bey b. Ahmed, Mahmud Çelebi b. İlyas.