Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 227 Hüküm no: 192 Orijinal metin no: [56b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun bt. Mustafa’ya hibe edilmiş olan eve müdahale edilmemesi Mahmiye-i Galata’ya tâbi‘ kasaba-i Kasımpaşa mahallâtından Câmi‘-i Kebîr mahallesinde sâkin iken bundan akdem vefât eden es-Seyyid Ali Çelebi b. es-Seyyid İsmail nâm müteveffânın verâseti sulbî kebîr oğlu es-Seyyid Mehmed Ağa ve sulbî sagīr oğlu es-Seyyid Hasan Çelebi ve zevce-i metrûkesi Âişe Hâtun bt. Mustafa nâm kimesnelere münhasıra olduğu şer‘an mütebeyyin oldukdan sonra râfi‘atü hâze’l-kitâb seyyidetü’l-muhadderât merkūme Âişe Hâtun meclis-i şer‘-i hatîr-i lâzimü’t-tevkīre mezbûre Mehmed Ağa kendi tarafından sagīr-i mezbûr Hasan Çelebi’nin tesviye-i umûruna kıbel-i şer‘den vesâyeten mahfil-i kazâya ihzâr ve mahzarında takrîr-i da‘vâ edip müteveffâ-yı mezbûr es-Seyyid Ali Çelebi hâl-i hayâtında ve kemâl-i sıhhatinde târih-i kitâbdan sekiz sene mukaddem havass-ı Kostantıniyye el-mahmiyye müzâfâtından olup Çatalca nâm kasabada vâki‘ inde’l-ahâlî ve’l-cîrân ma‘lûmü’l-hudûd olan dört ocak mülk menzilini ba‘de’t-tahliye bana hibe-i sahîha-i şer‘iyye ile hibe ve temlîk ve teslîm edip ben dahi meclis-i hibede kabz ve ittihâb edip mutasarrıfa iken mâni‘ olurlar suâl olunup mûcebiyle amel olunmasını taleb ederim dedikde, gıbbe’s-suâl akībe’l-inkâr müdde‘iye-i mezbûreden da‘vâsına mutâbıka beyyine taleb olundukda udûl-i ricâlden Hasan Ağa b. İbrahim ve Mehmed Çelebi b. Ahmed ve İbrahim Reis b. Yusuf ve nisâ tâifesinden Hatice Hâtun bt. Mustafa ve Meleksimâ Hâtun bt. Abdullah nâm kimesneler li ecli’ş-şehâde meclis-i şer‘a hâzırûn olup gıbbe’l-istişhâd fi’l-vâki‘ mezbûr es-Seyyid Ali Çelebi târih-i kitâbdan sekiz sene mukaddem menzil-i mezbûru zevcem mezbûre Âişe Hâtun’a ba‘de’t-tahliye hibe ve temlîk ve teslîm eyledim deyû bizim huzûrumuzda kirâren ve mirâren ikrâr eyledi. Biz bu husûsa bu vech üzere şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a olmağın merkūm es-Seyyid Mehmed Ağa mu‘ârazadan men‘ birle mâ hüve’l-vâki‘ bi’t-taleb ketb olundu. Cerâ zâlike ve hurrire fi’l-yevmi’s-sâmin min Cumâdelûlâ li sene isneteyn ve hamsîn ve elf. Şuhûdü’l-hâl: Fahrü erbâb-ı ve’r-rakam Ali Efendi b. Mehmed, Mustafa b. Hüseyin, Mustafa b. İskender, Memi b. Mustafa, Mehmed Çelebi Reis-i sultânî, İbrahim Bey b. Abdullah, Mahmud b. İlyas, Mehmed Çelebi b. Mustafa, Ramazan Efendi [b.] Mustafa Tezkireci.