Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 237 Hüküm no: 201 Orijinal metin no: [59a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Abdullah’ın azat edilmiş olduğu Mahmiye-i Galata müzâfâtından kasaba-i Tophâne mahallâtından olup Cihangir sâkinlerinden iken bundan akdem vefât eden Abdurrahman Beşe b. Mehmed nâm râcilin zevce-i metrûkesi Râbia bt. Hasan nâm hâtundan gayrı zâhirde vâris-i ma‘rûfu olmayıp verâsetinin rub‘u mezbûre Râbia’ya ve selâse-i erbâ‘ı beytülmâle münhasıra olduğu şer‘an mütehakkik oldukdan sonra işbu râfi‘-i hâze’l-kitâb orta boylu çatık kaşlı kara gözlü sağ omuzunda eser-i cerâhati olan Yusuf b. Abdullah nâm kimesne meclis-i şer‘-i hatîr-i lâzimü’t-tevkīrde mezbûre Râbia mahzarında takrîr-i kelâm ve ta‘bîr-i merâm edip abd-i memlûkü olduğumuz müteveffâ-yı mezbûr Abdurrahman Beşe hâl-i hayâtında ve kemâl-i akl-i sıhhatinde beni âzâd eylemiş idi mezbûr Abdurrahman Beşe civâr-ı rahmet-i Hayy-i Kayyûm’a irtihâl ve intikāl edip âzâd olmuşdur, suâl olunup mûcebiyle amel olunmasın taleb ederim dedikde gıbbe’s-suâl ve akībe’l-inkâr müdde‘î-i mezbûr Yusuf’dan da‘vâsına mutâbık beyyine taleb olundukda udûl-i ricâlden el-Hâc Mansur Kapudân b. el-Hâc Abdullah ve Osman Hoca b. Seydi nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd ve fi’l-vâki‘ müdde‘î-i mezbûr Yusuf’u müteveffâ-yı mezbûr hâl-i hayâtında bizim huzûrumuzda hasbeten lillâhi’l-aliyyi’l-a‘lâ ve taleben li merzâti Rabbihi’l-kerîm mâlımdan âzâd eyledim deyû kirâren ve mirâren ikrâr ve i‘tirâf eyledi biz bu husûsa bu vech üzere şâhidleriz şehâdet dahi ederiz deyû her birleri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukdan sonra mezbûr Yusuf’un ıtkına hüküm birle mâ vaka‘a bi’t-taleb ketb olundu. Cerâ zâlike ve hurrire fi’l-yevmi’s-sâlis ve’l-ışrîn min şehri Cumâdelûlâ li sene isneyn ve hamsîn ve elf. Şuhûdü’l-hâl: Fahrü’l-müderrisîn Hüseyin Efendi Selânik ve fahrü’l-eimmeti’l-kirâm Hasan Efendi el-İmâm, Mehmed Hoca b. Mahmud, Receb b. Mehmed, Mustafa b. Mehmed, Kenan b. Abdullah ve gayruhüm.