Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 245 Hüküm no: 209 Orijinal metin no: [61b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Efendi b. Mehmed’in mirasından beytülmâle kalan kısmın verildiği Mahmiye-i Galata’da kasaba-i Tophâne mahallâtından mahalle-i Sefer Kethüdâ sâkinlerinden iken bundan akdem vefât eden Ömer Efendi b. Mehmed nâm müteveffânın verâseti vâlidesi Herdem bt. Nasuh ve zevce-i metrûke ve vârisesi Fâtıma bt. Abdullah nâm hâtunlara ve sulbiye-i sagīre kızları Gevher ve Âişe’ye ve li ebeveyn karındaşı olup zümre-i gılmân-ı acemiyândan Halil b. Mehmed nâm mefkūda münhasıra olup kable’l-kısme sagīre-i mezbûre Âişe dahi vefât edip verâseti li ebeveyn kız karındaşı mezbûre Gevher’e ve vâlidesi mezbûre Fâtıma’ya ve li ebeveyn ammisi mezbûr Halil’e münhasıra olduğu kable’l-kısme mezbûre Gevher dahi vefât edip verâseti vâlidesi mezbûre Fâtıma’ya ve li ebeveyn ammisi mezbûr Halil’e münhasıra olduğu şer‘an mütehakkik oldukdan sonra mefkūd-ı mezbûr Halil’in hisse-i şâyi‘asını ahz için mahmiye-i mezbûre yeniçeri beytülmâl emîni olan fahrü’l-emâsil ve’l-akrân Ahmed Ağa b. Mehmed nâm kimesne tarafından husûs-ı âti’l-beyânı ikrâra vekîl olup vekâleti ber nehc-i şer‘î sâbite olan mumcu Ahmed Beşe b. Hüseyin nâm râcil mahfil-i kazâda râfi‘atü hâze’l-kitâb mezbûre Fâtıma mahzarında bi’l-vekâle ikrâr ve i‘tirâf edip mefkūd-ı mezbûr Halil’e karındaşı merkūm Ömer Efendi’den isâbet eden yirmi dört sehimden bir sehim hisse-i şâyi‘a ve müteveffât-ı merkūme Âişe’den isâbet eden altı sehimden bir sehim hisse-i şâyi‘a ve yine müteveffât-ı mezbûre Gevher’den isâbet eden üç sehimden iki sehim hisse-i şâyi‘ası cem‘an dört sehim hisse-i şâyi‘asını müvekkilim mezbûr Ahmed Ağa merkūme Fâtıma’dan ahz ve kabz eden husûs-ı mezbûra müte‘allik zimmetini ibrâ-i âm ve iskāt-ı tâm eyledi dedikde vekîl-i merkūm Ahmed Beşe’nin vech-i muharrer üzere cârî olan kelâmını el-mukarru leha’l-merkūme Fâtıma Hâtun vicâhen tasdîk ve şifâhen tahkīk edicek mâ vaka‘a bi’t-taleb ketb olundu. Hurrire fî evâhiri Cumâdelûlâ li sene isneyn ve hamsîn ve elf. Şuhûdü’l-hâl: Osman Efendi b. Ali el-İmâm, Mehmed Halîfe b. ( ) el-Müezzin, Ali Bey b. İbrahim, Kâtib Mehmed Çelebi, Behzad Bey b. Abdullah, Durd[u] Ramazan, Mahmud b. İlyas.