Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 264 Hüküm no: 223 Orijinal metin no: [66a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Râziye bt. Hızır’ın vakfettiği üçte bir malına müdahale edilmemesi Mahmiye-i [Galata] hâricinde vâki‘ kasaba-i Kasımpaşa’da Bedreddin Bey mahallesinde sâkin işbu râfi‘ü’l-kitâb Ahmed Çelebi b. Mansur nâm kimesne mahfil-i şer‘-i şerîfde mahmiye-i mezbûrede beytülmâl-i âmme ve hâssa emîni olan umdetü’l-ekâbir ve’l-eşbâh Ali Ağa’nın vekîl-i sâbitü’l-vekâlesi es-Seyyid Musa Çelebi b. Mustafa mahzarında takrîr-i da‘vâ edip bundan akdem mahalle-i mezbûrede vefât eden Râziye Hâtun bt. Hızır sülüs mâlını vücûh-ı hayrâta vasiyyet edip tenfîzine beni vasiyy-i muhtâr nasb ve ihtiyâr edip bu hâl üzere musırra olduğu hâlde vefât etmişdi. Hâlâ mûmâ-ileyh es-Seyyid Musa Çelebi cümle muhallefâtını kabz edip sülüsünü bana teslîmden imtinâ‘ eder suâl olunup alıverilmesi matlûbumdur dedikde, gıbbe’s-suâl ve akībe’l-inkâr mezbûr Ahmed Çelebi’den da‘vâsına mutâbık beyyine taleb olundukda udûl-i müslimînden Osman Halîfe b. Siyâmi el-İmâm ve Mustafa Halîfe b. Mehmed el-Müezzin nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fî nefsi’l-emr müteveffât-ı mezbûre Râziye Hâtun bizim huzûrumuzda sülüs mâlını vücûh-ı hayrâta vasiyyet edip tenfîzine mezbûr Ahmed Çelebi’yi vasiyy-i muhtâr nasb ve ihtiyâr edip bu hâl üzere musırraten vefât eyledi biz bu husûsa bu vech üzere şâhidleriz şehâdet dahi ederiz deyû her biri şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri makbûle oldukdan sonra müteveffât-ı mezbûre Râziye Hâtun’un cümle muhallefâtı ( ) bin akçeye bâliğ olduğu müte‘ayyin olmağla sülüsü olan ( ) akçeyi vasiyy-i mezbûr Ahmed Çelebi’ye edâya mezbûr Musa Çelebi’ye teslîme tenbîh birle mâ vaka‘a bi’t-taleb ketb olundu. Fi’l-yevmi’l-hâmis aşer min Şa‘bâni’l-mu‘azzam li sene isneteyn ve hamsîn ve elf. Şuhûdü’l-hâl: Rıdvan [b.] Abdullah, Hamza [b.] Abdullah, Oruc [b.] İbrahim, Mahmud b. İlyas ve gayruhüm.