Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 271 Hüküm no: 231 Orijinal metin no: [68a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat Ali Bey b. Abdullah’a ait evin müzâyede ile satıldığı Mahmiye-i Galata’ya tâbi‘ kasaba-i Boğazkesen Rumelihisarı mahallâtından el-Hâc Kemal mahallesinde sâkin iken bundan akdem vefât eden Ali Bey b. Abdullah nâm müteveffânın zâhirde zevce-i metrûkesi Âişe Hâtun bt. Abdullah nâm hâtundan gayrı vâris-i ma‘rûfu olmamağla muhallefâtının rub‘u mezbûre Âişe Hâtun’a ve selâse-i erbâ‘ı beytülmâle âid ve râci‘ olduğu mütebeyyin oldukdan sonra mahmiye-i mezbûrede beytülmâl-i âmme ve hâssa emîni olan kıdvetü’l-emâcid ve’l-ekârim Ali Ağa b. el-Hâc Mehmed tarafından ber nehc-i şer‘î vekîl olup vekâleti sâbite olan Mustafa Çelebi b. Yakub nâm kimesne ile mezbûre Âişe Hâtun mahfil-i kazâda kasaba-i Tophâne mahallâtından Mustafa Ağa mahallesi sâkinelerinden işbu râfi‘atü hâze’l-kitâb seyyidetü’l-muhadderât Safiye Hâtun bt. Ali mahzarında her biri ikrâr ve i‘tirâf edip müteveffâ-yı mezbûrun muhallefâtından olup hisar-ı mezbûre mahallâtından mahalle-i mezbûrede vâki‘ bir tarafı Ali Çelebi b. Mustafa mülkü ve bir tarafı leb-i deryâ ve bir tarafı tarîk-i âm ile mahdûd olan fevkānî iki bâb tahtânî büyûtu ve sofayı ve kayıkhâneyi ve kenîfi müştemil olan menzili kirâren ve mirâren sûk-ı sultânîde bey‘-i men yezîd olup rağabât-ı nâs bi’l-külliye münkatı‘a oldukdan sonra mezbûre Safiye Hâtun üzerinde elli üç bin akçede karâr edip ziyâde ile tâlib-i âharı olmamağın menzil-i mezbûru asâleten ve vekâleten elli üç bin akçeye merkūme Safiye Hâtun’a bey‘-i bâtt-ı sahîh-i şer‘î ile bey‘ edip kabz-ı semen ve teslîm-i müsemmen eyledik, ba‘de’l-yevm menzil-i mezbûr merkūme Safiye Hâtun’un mülk-i müşterâsıdır keyfe mâ teşâ’ ve tahtâr mutasarrıfe olsun dediklerinde mukırrân-ı mezbûrânın asâleten ve vekâleten vech-i muharrer üzere cârî olan ikrârların el-mukarru leha’l-merkūme bi’l-muvâcehe tasdîk edicek mâ hüve’l-vâki‘ bi’t-taleb ketb. Tahrîren fi’l-yevmi’l-hâdî ve’l-ışrîn min şehri Ramazâni’l-mübârek li sene isneyn ve hamsîn ve elf. Şuhûdü’l-hâl: Fahrü’l-eimme Hızır Efendi b. Kemal el-İmâm, Halil Çelebi [b.] Hızır el-Müezzin, fahrü’l-akrân Mustafa Çorbacı b. Veli, Süleyman Çelebi b. Abdurrahman, el-Hâc Receb b. Abdullah, Muslihiddin Ağa b. Mustafa, el-Hâc Kaya b. Mustafa, Siyavuş Bey [b.] Abdullah, Rıdvan b. Abdullah, Ali Çelebi b. Osman, Mahmud b. İlyas, Mehmed Çelebi b. Ramazan ve gayruhüm mine’l-hâzırîn.