Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 276 Hüküm no: 239 Orijinal metin no: [69b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Ağa’dan kalan mirasın nâzırı olan Hasan b. Abdullah’ın hak sahiplerine haklarını verdiği Mahmiye-i Galata’ya tâbi‘ kasaba-i Tophâne mahallâtından el-Hâc Memi mahallesi sâkinelerinden iken bundan akdem müteveffât olan Fâtıma bt. İsmail Ağa nâm sagīrenin verâseti vâlidesi Gevher nâm hâtuna ve kız karındaşları kebîre Âişe ile sagīre Ümmühâni’ye münhasıra olduğu şer‘an mütehakkika oldukdan sonra müteveffât-ı merkūme ile sagīre-i mezbûre Ümmühân’ın kıbel-i şer‘den tesviye-i umûrları için mansûb vasîleri olan merkūme Gevher Hâtun meclis-i şer‘de bundan akdem müteveffât-ı merkūme ile mezbûre Ümmühân’ın nâzırları olup mezbûretâna babaları merhûm İsmail Ağa’dan intikāl eden hisse-i şer‘iyyelerine vaz‘-ı yed eden işbu râfi‘ü’l-kitâb Hasan Ağa b. Abdullah nâm kimesne mahzarında asâleten ve vesâyeten ikrâr ve i‘tirâf edip sagīre-i mezbûre Ümmühân’a babası müteveffâ-yı merkūmdan ve kız karındaşı müteveffâ-yı mersûme Fâtıma’dan irs-i şer‘ile intikāl eden on dokuz bin züyûf akçenin altından kıymet-i şer‘îsi olan on üç bin dört yüz doksan akçeyi ve kendi hisseme intikāl eden dokuz bin züyûf akçenin altından kıymet-i şer‘îsi olan altı bin yedi yüz kırk akçeyi mezbûr Hasan Ağa yedinden bi’t-tamâm ve’l-kemâl ahz ve kabz edip zimmetinde bir akçe ve bir habbe bâkī kalmamışdır dedikde, mukırr-ı merkūme Gevher Hâtun’un asâleten ve vesâyeten vech-i muharrer üzere cârî olan ikrârını el-mukarru lehü’l-merkūm Hasan Ağa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min şehri Ramazâni’l-mübârek li sene isneyn ve hamsîn ve elf. Şuhûdü’l-hâl: Sâhibü’t-tahrîr ve’l-kalem Hâfız Yusuf Çelebi, Ramazan Efendi b. Mustafa, fahrü’l-akrân Mahmud Ağa, Mahmud b. İlyas.