Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 282 Hüküm no: 242 Orijinal metin no: [70b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Amcası Veli Bey’in Mustafa Çelebi b. Can Ali Ağa’nın mirasından hakkını aldığı Mahmiye-i Galata’ya tâbi‘ kasaba-i Beşiktaş mahallâtından Yahya Efendi mahallesi sâkinlerinden iken bundan akdem vefât eden Mustafa Çelebi b. Can Ali Ağa nâm müteveffânın verâseti li ebeveyn ammisi Veli Bey b. Abdullah nâm kimesneye ve zevce-i metrûkesi Hatice bt. Ahmed nâm hâtuna münhasıra olduğu şer‘an mütehakkik oldukdan sonra merkūm Veli Bey meclis-i şer‘-i hatîr-i lâzimü’t-tevkīrde işbu râfi‘atü’l-kitâb mezbûre Hatice Hâtun mahzarında bi tav‘ihî ikrâr ve i‘tirâf edip mûrisimiz müteveffâ-yı merkūm Mustafa Çelebi’nin muhallefâtından irs-i şer‘le hisse-i şâyi‘ama isâbet eden yüz on dört bin akçeyi merkūme Hatice Hâtun yedinden bi’t-tamâm ve’l-kemâl ahz ve kabz edip min külli’l-vücûh zimmetini ibrâ ve iskāt eyledim ba‘de’l-yevm husûs-ı mezbûra müte‘allika benden da‘vâ ve nizâ‘ sâdıra olursa lede’l-hükkâm makbûle ve mesmû‘a olmasın dedikde mukırr-ı merkūm Veli Bey’in vech-i muharrer üzere cârî olan ikrârını el-mukarru leha’l-merkūm bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis aşer min Zilka‘de li sene isneyn ve hamsîn ve elf. Şuhûdü’l-hâl: Fahrü’l-akrân Ali Çavuş b. Mehmed el-Mübâşir, Abdi Bey b. Şaban, fahrü’l-kuzât Ramazan Efendi b. Mustafa, Hasan Çelebi b. Abdullah, Halil Efendi b. Pîrî, Mahmud b. İlyas, Ali Efendi b. Hüseyin ve gayruhüm.