Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 287 Hüküm no: 245 Orijinal metin no: [71b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın terekesi borcuna yetmediğinden evinin satılması Mahmiye-i Galata’ya tâbi‘ kasaba-i Tophâne mahallâtından Firuz Ağa mahallesi sâkinelerinden iken bundan akdem vefât eden Belkıs bt. Abdullah nâm hâtunun verâseti zevc-i metrûkü Ahmed b. ( ) nâm kimesneye ve sulbî oğulları Ahmed Çelebi ve Mehmed Çelebi nâm kimesnelere kebîrlere ve sulbiye kızı Safiye nâm sagīreye münhasıra olduğu şer‘an mütehakkik oldukdan sonra sagīre-i mezbûre Safiye’nin tesviye-i umûru için kıbel-i şer‘den mansûb vasîsi olan fahrü’l-müderrisîn Hüseyin Efendi b. İslâm nâm kimesne ile kebîr oğlu merkūm Mehmed Çelebi meclis-i şer‘-i hatîr-i lâzimü’t-tevkīrde işbu hâfızü’l-kitâb Osman b. Abdullah nâm kimesne mahzarında her birleri ikrâr-ı tâm ve takrîr-i kelâm müteveffât-ı merkūme Belkıs Hâtun’un mahalle-i mezbûrede vâki‘ bir tarafından İmâm oğlu mülkü ve iki tarafından mezbûrân Ahmed Çelebi ve Mehmed Çelebi mülkleri ve bir tarafından tarîk-i âm ile mahdûd bir bâb fevkānî ve bir bâb tahtânî beyti ve cüneyneyi ve kenîfi müştemil mülk menzilinden gayrı menkūlât kısmından deyni ihâta eder terekesi olmayıp ve müteveffât-ı merkūme medyûnen vefât etmekle menzil-i mezkûr bey‘ olunup ashâb-ı hukūka hakları îfâ olunması lâzım olmağla zarûret-i deyn için menzil-i mezkûrun bey‘ olunmasına kıbel-i şer‘den izin verilip bey‘a arz olundukda sûk-ı sultânîde bey‘-i men yezîd olunup beyne’t-tâlibîn kirâren ve mirâren müzâyede olunup rağabât-ı nâs bi’l-külliye münkatı‘a oldukdan sonra mezbûr Osman üzerinde yirmi bin akçeye karâr edip ziyâde ile tâlib-i âharı olmamağla menzil-i mezkûrun merkūm Osman’a yirmi bin râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i müsemmen eyledik, ba‘de’l-yevm menzil-i mezkûr merkūm Osman’ın mülk-i müşterâsıdır keyfe mâ yeşâ’ ve yahtâr mutasarrıf olsun dediklerinde mukırrân-ı merkūmânın vech-i muharrer üzere cârî olan ikrârlarını el-mukarru lehü’l-merkūm Osman vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min Zilka‘de li sene isneyn ve hamsîn ve elf. Şuhûdü’l-hâl: Abdurrahman Efendi b. Durmuş el-İmâm, Pîrî Bey b. Abdullah, Ali Bey b. Abdullah, Receb b. Mustafa, Mustafa (...), Mehmed b. Receb ve gayruhüm.