Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 296 Hüküm no: 254 Orijinal metin no: [73b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Reis b. Sefer’in kızı Rahime’ye evini hibe ettiği Mahmiye-i Galata’ya tâbi‘ kasaba-i Tophâne mahallâtından Tomtom mahallesi sâkinlerinden Mehmed Reis b. Sefer meclis-i şer‘-i hatîr-i lâzimü’t-tevkīrde sulbiye kızı işbu râfi‘atü’l-kitâb Rahime Hâtun mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ olup bir tarafı kendi mülküne ve bir tarafı ba‘zan Ali Çelebi b. Mehmed mülküne ve bir tarafı ba‘zan Âişe Hâtun vakfı’na ve bir tarafı ba‘zan tarîk-i hâs ile mahdûd olan iki bâb fevkānî ve iki bâb tahtânî beytini ve bi’r-i mâyı ve kenîfi ve cüneyneyi ve eşcâr-ı müsmire ve gayr-ı müsmireyi müştemil olan menzilini cemî‘ tevâbi‘ ve levâhıkı ile mezbûre Rahime Hâtun’a hibe-i sahîha-i şer‘iyye ile hibe ve temlîk ve teslîm eyledim ba‘de’l-yevm menzil-i merkūme mezbûre Rahime Hâtun’un mülk-i mevhûbudur keyfe mâ teşâ’ ve tahtâr mutasarrıfa olsun dedikde mezbûre Rahime Hâtun meclis-i hibede kabz ve ittihâb eyleyip mukırr-ı mezbûrun vech-i meşrûh üzere cârî olan ikrârını el-mukarru leha’l-merkūm vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Cerâ zâlike ve hurrire fi’l-yevmi’s-sâmin min şehri Rebî‘ilevvel li sene selâse ve hamsîn ve elf. Şuhûdü’l-hâl: Fahrü’l-eimme Abdurrahman Efendi b. Durmuş el-İmâm, Ramazan Halîfe b. Ahmed el-Müezzin, es-Seyyid Mustafa Çelebi b. es-Seyyid Habib, Mehmed b. Ahmed, Ali Çelebi b. Ahmed, İbrahim Çelebi b. Ahmed, Mehmed b. Hüseyin, Mahmud b. İlyas ve gayruhümü’l-hâzırîn.