Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 301 Hüküm no: 259 Orijinal metin no: [74b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma ve İsmihan adlı çocuklara nafaka takdir edildiği Hâkim-i muvakki‘ a‘lâ hâze’l-kitâb bi tevkī‘ihi’l-müstetâb, mahmiye-i Galata tevâbi‘inden Tophâne kasabası mahallâtından İlyas Çelebi mahallesinde sâkin iken bundan akdem vefât eden Halil Bey b. İskender’in Fâtıma ve İsmihan nâm sagīreyninin nafaka, kisve ve sâir havâic-i lâzımeleri için, himâye ve terbiyesi altında bulundukları hâmiletü hâze’l-kitâb Âişe Hâtun bt. Rıdvan Beşe nâm annelerinin talebiyle müteveffâ-yı mezbûr babalarından irs-i şer‘le kendilerine intikāl eden mallardan alınmak üzere zeyl-i kitâbda mezkûr târihden i‘tibâren yevmî râyicü’l-vakt on akçe farz ve takdîr etti. Hâkim-i mûmâ-ileyh sonra meblağ-ı mefrûz-ı mezkûrun sagīreyn-i merkūmeynin havâicine sarfına ve vakt-i hâcetde istidâne edip lede’z-zafer rücû‘una mezbûre Âişe Hâtun’a izin verdi. Cerâ zâlike ve hurrire fî gurreti Rebî‘ilâhir sene selâse ve hamsîn ve elf. Şuhûdü’l-hâl: Fahrü’l-kuzât Ramazan Efendi b. Mustafa, Abdi Bey b. Mustafa, Osman Çelebi b. Sefer, Ali b. Mustafa, Mehmed Çelebi b. el-Haddâm, Mahmud b. İlyas