Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 307 Hüküm no: 265 Orijinal metin no: [76a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Bayram’ın kızı Ayşe’nin vasîsi üzerindeki haklarını aldığı Vech-i âtî üzere ikrâr ve tasdîk mahallinde ketb ve tenmîk olunmak için kıbel-i şer‘-i şerîfden bi’t-taleb irsâl olunan Mustafa Efendi b. el-Hâc Ali zeyl-i kitâbda mastûrü’l-esâmî olan müslimîn ile mahmiye-i Galata hâricinde kasaba-i Kasımpaşa mahallâtından Tahtaminâre mahallesinde vâki‘ Hasan b. Ebûbekir nâm kimesnenin menziline varıp akd-i meclis eylediğinde sin ve cüssesinin bülûğa tahammülü olup bülûğunu mu‘terife olan Âişe bt. Bayram nâm hâtun meclis-i mezbûrda hâl-i sıgārında vasiyy-i mansûbu olan işbu râfi‘ü’l-kitâb mezbûr Hasan mahzarında bi tav‘ihâ ikrâr ve takrîr-i kelâm edip babam mezbûr Bayram müteveffâ oldukda verâseti bana ve vâlidesi Cennet bt. Cafer nâm hâtuna ve li ebeveyn karındaşı mezbûr Hasan’a münhasıra olup ba‘dehû mezbûre Cennet dahi müteveffâ olup verâseti merkūm Hasan’a münhasıra olmağın babam müteveffâ-yı merkūmun terekesinin tashîh-i mes’elesi olan altı sehimin üç sehimi bana ve üç sehimi mersûm Hasan’a isâbet edip lâkin ben sagīre olmağla müteveffâ-yı merkūmun muhallefâtından mahalle-i mezbûrede vâki‘ bir tarafı Hasan Reis b. Abdullah mülkü ve bir tarafı Osman Reis b. Abdullah mülkü ve bir tarafı müteveffâ-yı merkūmun mülk-i âharı ve bir tarafı tarîk-i âm ile mahdûd bir bâb fevkānî ve bir tahtânî beyti ve yanında bir küçük odayı ve sofayı ve bi’r-i mâyı ve kenîfi ve eşcâr-ı müsmire ve gayrı müsmireyi müştemil olup on üç bin akçe kıymetli mülk menzil ve yine bir tarafı mezbûr Osman Reis ve ba‘zan Muhzır Abdi mülkleri ve bir tarafı el-Hâc Mustafa b. Abdullah mülkü ve bir tarafı menzil-i mezkûr ve bir tarafı tarîk-i âm ile mahdûd bir bâb tahtânî beyti ve bi’r-i mâyı ve kenîfi ve cüneyneyi müştemil olup on bin akçe kıymetli mülk menzil bilâ-taksîm ve zikr olunan menzillerden mâ‘adâ terekesinden ba‘de’t-taksîm bana isâbet eden iki bin üç yüz râyicü’l-vakt akçe hisse-i şer‘iyyem vasiyy-i mezbûr yedinde mazbût idi, hâlâ ben bâliğa ve reşîde olmağla menzilân mezkûrânın kıymetleri olan yirmi üç bin akçeden irs-i şer‘le bana âid olan on bir bin beş yüz akçe ile meblağ-ı mezbûr iki bin üç yüz akçe hisse-i şer‘iyyem mukābelesinde zikr olunan on üç bin akçe kıymetli menzil ile on kıt‘a riyâ[lî] guruşu vasiyy-i merkūm yedinden ahz ve kabz eyledim ba‘de’l-yevm sâlifü’z-zikr on bin akçe kıymetli menzil müstakillen mezbûr Hasan’ın mülk-i mevrûsudur benim alâka ve medhalim olmadığından mâ‘adâ muhallefât-ı mezkûreye müte‘allik da‘vâdan birbirimizin zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik min ba‘d mazmûn-ı kitâba muhâlif ahad-ı tarafeynden âhar üzerine da‘vâ sudûr ederse lede’l-hükkâmi’l-kirâm mesmû‘a olmaya dedikde mukırra-i merkūmenin vech-i meşrûh üzere cârî olan ikrârını el-mukarru lehü’l-merkūm Hasan vicâhen tasdîk ve şifâhen tahkīk ettiğin mevlânâ-yı mezbûr mahallinde tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Tahrîren fî evâili Cumâdelûlâ li sene selâse ve hamsîn ve elf. Şuhûdü’l-hâl: Abdülcabbar Efendi b. Ahmed el-İmâm, Mustafa Bey b. Ömer el-Cündî, el-Hâc Mustafa b. Abdullah, Halil Çavuş b. Yusuf, Hasan Beşe b. Receb, el-Hâc Bâli b. Mehmed, Mustafa b. Hızır, Ali Reis b. Hamza, Mehmed Çelebi b. Ramazan, Mehmed b. Zülfikār, Mehmed b. Oruc, Mahmud b. İlyas.