Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 309 Hüküm no: 267 Orijinal metin no: [76b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vasî es-Seyyid Mahmud Çelebi’de Mustafa Beşe b. Abdullah’ın varislerinin hakkı kalmadığı Mahmiye-i Galata’da Emekyemez mahallesinde sâkin iken bundan akdem vefât eden Mustafa Beşe b. Abdullah nâm râcilin verâseti zevce-i metrûkesi Şah Hâtun bt. Abdullah ile sulbî kebîr oğlu Osman Çelebi ve sulbî sagīr oğlu Ömer ve sulbiye kebîre kızı Sâliha’ya münhasıra olup ba‘dehû mezbûr Ömer vefât edip verâseti vâlidesi mezbûre Şah Hâtun ile karındaşları merkūmân Osman Çelebi ve Sâliha’ya münhasıra olduğu şer‘an zâhir ve mütehakkik oldukdan sonra mezbûrûn Osman Çelebi ve Şah Hâtun ve Sâliha meclis-i şer‘de sagīr-i merkūmun vasiyy-i muhtârı olan işbu râfi‘ü’l-kitâb es-Seyyid Mahmud Çelebi b. es-Seyyid Mehmed mahzarında her biri ikrâr ve takrîr-i kelâm edip mezbûr es-Seyyid Mahmud sagīr-i merkūma vasiyy-i muhtâr olmağla müteveffâ-yı merkūmun terekesinde sagīr-i mezbûr ile bize intikāl eden yirmi dört bin beş yüz seksen akçeye vaz‘-ı yed etmişdi. Hâlâ sagīr-i mersûm vefât edip hisse-i şer‘iyyesi bize isâbet etmeğin mârrü’z-zikr yirmi dört bin beş yüz seksen akçeyi vasiyy-i merkūm es-Seyyid Mahmud Çelebi yedinden bi’t-tamâm ve’l-kemâl ahz ve kabz eyledik min ba‘d muhallefât-ı mezkûreden zimmetinde bir akçe ve bir habbe kalmadı dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min Cumâdelûlâ li sene selâse ve hamsîn ve elf. Şuhûdü’l-hâl: El-Hâc Ali b. Kasım el-Haffâf, Hızır Beşe b. Yusuf, el-Hâc Haydar b. Abdullah, Mustafa Çelebi. b. Seyfullah, Hüseyin Reis b. Mehmed, Hüseyin Beşe b. Abdullah, Receb Reis b. Mustafa, el-Hâc Süleyman b. Abdullah, el-Hâc Mehmed b. el-Hâc Yusuf, Ali Dede b. Abdullah el-Kayyım.