Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 316 Hüküm no: 275 Orijinal metin no: [78b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat etmiş olan Hüseyin Efendi b. İslâm’ın karısına bir kısım eşyayı hibe etmiş olduğu Mahmiye-i Galata hâricinde kasaba-i Tophâne mahallâtından Firuz Ağa mahallesinde sâkin iken bundan akdem vefât eden Hüseyin Efendi b. İslâm’ın zevce-i metrûkesi işbu râfi‘ü’l-kitâb Perihan Hâtun bt. Abdullah meclis-i şer‘-i şerîf-i lâzimü’t-teşrîfde müteveffâ-yı merkūmun sulbî sagīr oğlu Fazlullah Çelebi’nin vasiyy-i muhtârı olan Cafer Ağa b. Süleyman mahzarında üzerine da‘vâ ve takrîr-i kelâm edip ben müteveffâ-yı mezbûrun mu‘takası olup bundan akdem beni tezevvüc eylediğinde emvâlinden işbu dört beledî döşek ve dört minder ve iki yorgan ve sekiz çatma yastık ve biri kırmızı ve biri beyaz iki velense ve bir yan keçesini bana hibe-i sahîha-i şer‘iyye ile [hibe] ve teslîm edip ben dahi meclis-i hibede ittihâb ve kabûl etmişdim hâlâ mezbûr Cafer Ağa eşyâ-i mezkûreyi müteveffâ-yı mezbûrun terekesindendir deyû vaz‘-ı yed eder suâl olunup alıverilmesi matlûbumdur dedikde gıbbe’s-suâl merkūm Cafer Ağa eşyâ-i mezkûreye vaz‘ eylediğini ikrâr ve hibe-i merkūmeyi inkâr ile cevâb vericek müdde‘iye-i mezbûreden müdde‘âsını mübeyyine beyyine taleb olundukda udûl-i müslimînden Hasan Efendi b. Mehmed el-İmâm ve Ali Efendi b. Ebûbekir meclis-i şer‘a li ecli’ş-şehâde hâzırân olup isre’l-istişhâdi’ş-şer‘î fi’l-vâki‘ mezbûre Perihan müteveffâ-yı merkūmun mu‘takası olup bundan akdem mersûmeyi tezevvüc eylediğinde emvâlinden zikr olunan işbu dört beledî döşeği ve dört minder ve iki çatma yorgan ve sekiz yastık ve biri kırmızı ve biri beyaz iki velense ve bir yan keçesini bizim huzûrumuzda mezbûre Perihan’a hibe-i sahîha-i şer‘iyye ile hibe ve teslîm ve ol dahi meclis-i hibede ittihâb ve kabûl eyledi biz bu husûsa şâhidleriz ve şehâdet dahi ederiz deyû her biri edâ-i şehâdet-i şer‘iyye eylediklerinde gıbbe şerâiti’l-kabûl şehâdetleri makbûle olmağın mûcebiyle hükm olunup mâ vaka‘a bi’t-taleb ketb olundu. Tahrîren fî gurreti Recebi’l-ferd li sene selâse ve hamsîn ve elf. Şuhûdü’l-hâl: Kıdvetü’l-a‘yân Hasan Ağa b. Haydar Ser-zevvâk-ı sultânî, Abdurrahman Efendi b. Durmuş el-İmâm, Ali Efendi b. Ebûbekir el-İmâm, Ramazan Efendi b. Mustafa, Mehmed b. Receb, Mahmud b. İlyas, Mustafa Çelebi b. Mahmud el-Müezzin, Mahmud Dede el-Müezzin, Mehmed b. Receb el-Kayyım ve gayruhüm mine’l-huzzâr.