Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 54 Hüküm no: 10 Orijinal metin no: [2a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arakil v. Murat’ın Ekmekçi Parsuk’a olan borcunu ödemesi gerektiği Kasaba-i Beşiktaş’da habbâz tâifesinden işbu râfi‘ü’s-sifr Parsuk v. Şadik nâm Ermeni mahfil-i kazâda mahmiye-i Galata bezzâzistân ahâlîsinden Arakil v. Murat nâm Ermeni muvâcehesinde üzerine da‘vâ ve takrîr-i kelâm edip mezbûr Arakil zimmetinde cihet-i karz-ı şer‘îden on bir bin yüz yirmi akçe hakkım olup taleb eylediğimde edâdan imtinâ‘ eder hattâ mezbûr Arakil’i mezbûrun dokuz bin akçesini mukaddemâ zimmetinde bana deyni olduğunu şuhûd mahzarında ikrâr dahi eylemişdir hâlâ merkūma suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ricâlden olup mahmiye-i mezbûre sükkânından Asvader v. Manik ve Karabet v. Manik nâm Ermeniler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûr Arakil’i mukaddemâ bizim huzûrumuzda müdde‘î-i merkūm Parson cihet-i merkūmeden dokuz bin akçe zimmetimde deynim vardır deyû ikrâr ve i‘tirâf edip bizi istişhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyete şerâiti’l-kabûl şehâdetleri makbûle oldukdan sonra ziyâde müdde‘âsını mübeyyine beyyine taleb olundukda ityân-ı beyyine için istimhâl etmeğin mehl-i şer‘î ile ba‘de’l-imhâl meblağ-ı mezbûr dokuz bin akçenin edâsıyla mezbûr Arakil ilzâm olunup mâ vaka‘a bi’t-taleb ketb olundu. Fi’l-yevmi’l-hâdî ve ışrîn min şehri Recebi’l-ferd li sene selâse ve seb‘în ve elf Şuhûdü’l-hâl: Süleyman Efendi en-Nâib, Musa b. Receb, Mustafa b. Receb, Emrullah b. Mehmed, Zülfikār b. İbrahim