Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 404 Hüküm no: 542 Orijinal metin no: [81b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı İbrahim b. Bayram’ın kölesi Rıdvan b. Abdullah’ı azat ettiği Mahmiye-i Galata’da Câmi‘-i Kebîr mahallesinde sâkin keresteci el-Hâc İbrahim b. Bayram nâm kimesne meclis-i şer‘-i hatîr-i lâzımü’t-tevkīrde mukaddemâ kendiye rıkkını mu‘terif olan orta boylu gök gözlü hâfız-ı hâze’l-kitâb Rıdvan b. Abdullah muvâcehesinde bi’t-tav‘i’s-sâf ikrâr ve i‘tirâf edip ıtk-ı rakabât a‘zam-ı kurbât ve vesîle-i ref‘-i derecât ve sebeb-i duhûl-i cennât-ı âliyât olduğundan mâ‘adâ mu‘takın ıtkı mukābelesinde mu‘tıkın cemî‘ uzvu nârdan âzâd olduğunu nâtık hadîs-i şerîfin mefhûmuna muttali‘ olmağın mevsûf-ı mezbûru silk-i mülkümde münselik olduğu hâlde târih-i kitâbdan üç sene mukaddem hasbeten lillâhi te‘âlâ li rûhi resûlihi’l-mu‘allâ tahrîr ve i‘tâk ve zümre-i ahrâr-ı asliyyîne idrâc ve ilhâk etmişidim mevsûf- mezbûr târih-i mezkûrdan beri sâir ahrâr-ı asliyyîn gibi hür olup üzerinde müvellâ için şer‘an sâbit olan velâ-i şer‘îden gayrı hakkım bâkī kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: El-Hâc Süleyman b. Abdullah, Yusuf b. Abdullah, Berber Mehmed Beşe b. Abdülkādir, natır Hasan Beşe b. Abdullah, Ahmed Çelebi b. el-Hâc Süleyman.