Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 104 Hüküm no: 42 Orijinal metin no: [8b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmet Ağa’nın, vefatından kısa süre önce Himmet Beşe’ye sattığı evin kalan parasını varislerinden talep ettiği Mahrûse-i Galataˈda Sultân Bâyezid mahallesinde sâkin Ahmed Ağa b. Mustafa meclis-i şer‘-i şerîfde mahrûse-i mezbûre a‘mâlinden kasaba-i Tophâneˈde Süheyl Bey mahallesinden olup işbu sene-i mübârekede seferde fevt olan el-Hâc Himmet Beşe b. Mustafa nâm kimesnenin verâseti zevceteyn-i metrûketeyni Râbia bt. Ali ve Belkıs bt. Abdullah nâm hatunlara ve sulbî sagīr oğulları Yahya ve Süleyman ve sagīre kızları Fâtıma ve Rukiyeˈye münhasıra olduğu şer‘an zâhir ve müte‘ayyin oldukdan sonra sıgār-ı mezkûrînin tesviye-i emirlerine kıbel-i şer‘den mansûb vasîleri olup tereke-i müteveffâ-yı mezbûra vâzi‘atüˈl-yed olan vâlideleri mezbûre Râbia mahzarında ikrâr ve takrîr-i kelâm edip bundan akdem müteveffâ-yı mezbûra emlâkimden kasaba-i Beşiktaş kurbünde Maçka [9a] nâm karyede vâki‘ bir tarafdan merhûm Kızlar Ağası Vakfı ve bir tarafdan ba‘zan Ali Paşa Vakfı ve ba‘zan vâdî ve bir tarafdan tarîk-i âm ile mahdûd hâriciye ve dâhiliyede büyût-ı adîde ve köşkleri ve havuzu ve eşcâr-ı müsmire ve gayrı müsmire hadîka[yı] müştemil mülk menzilimi cümle tevâbi‘iyle bin iki yüz esedî guruşa bâtten bey‘ ve teslîm ol dahi ba‘deˈl-iştirâ veˈt-tesellüm semeni olan meblağ-ı mezbûrun bin yüz altmış altı esedî guruşu hayatında yedinden alıp kabz edip bâkī otuz dört esedî guruş hakkım bin seksen iki senesi Zilhiccesiˈnde huzûr-ı hâkimde ba‘deˈd-da‘vâ edâsı’çün mezbûr el-Hâc Himmet üzerine hükm-ı şer‘î lühûkından sonra merkūmel-Hâc Himmet kableˈl-edâ fevt olmağla meblağ-ı mezbûr zimmetinde kalmışidi el-hâletü hâzihî meblağ-ı mezbûr otuz dört esedî guruşu vasî-i merkūme Râbia yedinden biˈt-tamam ahz u kabz edip meblağ-ı mezbûrdan müteveffâ-yı mezbûrun zimmetinde vechen mineˈl-vücûh hak ve alâkam kalmayıp menzil-i mezbûr müteveffâ-yı merkūmun mülk-i sarîhidir dedikde gıbbeˈt-tasdîkiˈl-mu‘teber mâ vaka‘a biˈt-taleb ketb olundu. Fiˈl-âşir min-Muharremiˈl-harâm li-sene erba‘a ve semânîn ve elf. Şuhûdüˈl-hâl: Mehmed Efendi b. Rıdvan el-imâm, el-Hâc Nasuh Beşe b. Mahmud, Mustafa Bey b. Osman, Ali Beşe b. Mustafa, İbrahim Çelebi b. Abdülbaki kâtib-i beytü›l-mâl