Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 149 Hüküm no: 71 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Kalafat Hasan Beşe’nin vasiyet ettiği işlerin yapılması için malın üçte biri için Bekir Halife’yi vasî tayin ettiği İşbu sahibüˈl-vesîka Bekir Halîfe b. Mustafa meclis-i şer‘-i şerîfde mahrûse-i Galata a‘mâlinde kasaba-i Tophâne mahallâtından Cihangir mahallesinde sâkin iken bundan akdem vefât eden Kalafat Hasan Beşe b. Abdullahˈın verâseti zevceteyn-i metrûketeyn Fatma bt. Abdullah nâm hatunlara ve kebîre kızı Emetellah ve sulbî sagīr oğlu ve sagīre kızı Fatmaˈya münhasıra olduğu şer‘an zâhir ve müte‘ayyin oldukdan sonra sagīrân-ı mezbûrânın tesviye-i emirlerine kıbel-i şer‘den mansûb vasîleri ve vâlideleri olan mezbûre Şâkire ile merkūmân Fatma ve Emetullah mahzarlarında üzerlerine da‘vâ ve takrîr-i kelâm [edip] müteveffâ-yı mezbûr hâl-i sıhhatinde bi-emrillahi te‘âlâ vefâtımdan sonra cümle mâlımın sülüsünden beş bin akçe ifrâz olunup meblağ-ı mezbûrun iki bin akçesi techîz ve tekfîn ve yevm-i mevtimde tabh olunan helvâma sarf oluna ve iki bin beş yüz akçesi üçümde ve yedimde ve kırkımda ve senemde tabh-ı ta‘âm olunup fukarâ-yı Müslimîn oluna ve beş yüz akçesi mezarım üstüne vaz‘ olunacak taşlara verile deyü huzûr-ı Müslimînˈde vasiyet ve ikrâr ve Müslimînˈi işhâd ve musırratan alâ-ikrârihî vefât edip sülüs mâlı dahi meblağ-ı mezbûra müsâ‘id ve tenfîzinebeni vasî-i muhtâr nasb ve ta‘yîn ve ben dahi ba‘deˈl-kabûl meblağ-ı mezbûr beş bin akçeyi mezkûrâtın yedlerinde olan tereke-i müteveffâyı merkūmdan biˈl-vesâye taleb ederim suâl olunsun dedikde gıbbeˈs-suâl veˈl-inkâr vasî-i mezbûrdan müdde‘âsına mübeyyine beyyine taleb olundukda mahalle-i mezbûrede sâkin Esad Efendi b. Hasan [17a] ve Mehmed Ali Çelebi b. Mehmed nâm kimesneler li-ecliˈş-şehâde meclis-i şer‘a hâzıran olup isreˈl-istişhâd fi’l-vâkiʻ müteveffâ-yı mezbûr hâl-i sıhhatinde bi-emrillâh-i te‘âlâ vefâtından sonra cümle mâ-melekimin sülüsünden beş bin akçe ifrâz olunup meblağ-ı mezbûru tafsîli murâd ettiği vech üzere bizim huzûrumuzda vasiyet ve ikrâr ve tenfîze mezbûr Bekir Halîfeˈyi vasîyy-i muhtâr nasb ve ta‘yîn ol dahi ba‘deˈl-kabûl musırratan alâ-ikrârihî vefât edip sülüs mâlı dahi meblağ-ı mezbûra müsâ‘iddir biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâyitiˈl-kabûl şehâdetleri makbûle oldukdan sonra mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-âşir min-Muharremiˈl-harâm li-sene erba‘a ve semânîn ve elf. Şuhûdüˈl-hâl: Şa‘bân Efendi el-imâm, Hamza Beşe b. Mehmed, Receb Bey b. Mehmed, Abdi Beşe Kalafatçı, Ahmed b. Osman